Güclü külək rayonlarda fəsadlara səbəb olub VİDEO

Şəkidə güclü külək irigövdəli ağacları aşırıb, kommunikasiya xətləri zədələnib.

Xezerxeber.az-ın məlumatına görə, Şəkidə küləyin törətdiyi fəsad nəticəsində mərkəzi pospektdə hərəkət bağlanıb.

Məhəmməd Əmin Rəsulzadə prospektində səhərə yaxın küləyin təsirindən irigövdəli ağac aşıb, nəticədə  yolun üstündə quraşdırılan reklam konstruksiyaları, işıq dirəkləri qoparaq yolun hərəkət hissəsinə düşüb. İşıq və rabitə-internet xətləri zədələnib. Əraziyə aidiyyəti qurumların əməkdaşları cəlb olunaraq mərkəzi yolda hərəkəti bərpa ediblər.

Göyçayda da güclü külək bir çox evlərin dam örtüklərini uçurub, ağaclar aşıb. Elektrik dirəklərinin aşması nəticəsində rayonda enerjinin verilməsində fasilələr yaranıb. Dam örtükləri bir neçə avtomobilə də ziyan vurub.

Qəbələdə də güclü külək təsirli olub. Rayonun Zarağan kəndində yerləşən böyük marketlərdən birinin dam örtüyü uçaraq magistral yola düşüb. Bir müddət avtomobillərin hərəkətində çətinliklər yaranıb. Hadisə nəticəsində bir neçə avtomobilə də ciddi ziyan dəyib. Oxşar çətinliklər Qəbələ şəhərində də yaşanıb. İri gövdəli ağacların aşması nəticəsində avtomobillər əzilib, rabitə işıq xətləri qırılıb. Xoşbəxtlikdən xəsarət alan olmayıb. Aidiyyəti qurumlar yollarda hərəkəti bərpa ediblər və digər tədbirlər davam etdirilir.

Xezerxeber.az mövzu ilə bağlı daha ətraflı videomaterialı təqdim edir.