Bakı-Sumqayıt qatarı yolda qaldı VİDEO

Bu gün səhər saatlarında sərnişinlə dolu olan qatar yolda qalıb. Onsuz da güclə ayaq üstə dayanan sərnişinlər nasazlıq səbəbindən yolda qalan qatarda daha da çətin vəziyyətə düşüblər.

Xezerxeber.az-ın məlumatına görə, bununla bağlı görüntüləri sərnişinlərdən biri Bakı-Sumqayıt qatarında çəkərək sosial şəbəkələrdə paylaşıb.

Səhər saatlarında Bakı-Pirşağı-Sumqayıt qatarı bir saatdan çox Sabunçu ərazisində dayanıb.

Məlumata görə, buna yolun kontakt şəbəkəsində yaranan problem səbəb olub. Dərhal "Azərbaycan Dəmir Yolları" QSC-nin əməkdaşları əraziyə cəlb edilib və texniki nasazlığı aradan qaldırmağa başlayıblar.

Qurumun mətbuat xidmətinin əməkdaşı Bəxtiyar Hacıyev ''Xəzər Xəbər''ə bildirib ki, yolda yaranan nasazlığa görə, qatar 1 saat 33 dəqiqədən sonra yola düşüb.

Qeyd edək ki, belə hallar Bakı-Sumqayıt qatarında tez-tez baş verir.

"Azərbaycan Dəmir Yolları" QSC-dən o da bildirildi ki, texniki nasazlıqların vaxtında aşkar edilib aradan qaldırılması istiqamətində işlər görülür.

Xezerxeber.az mövzu ilə bağlı daha ətraflı videomaterialı təqdim edir.