Saray qəsəbəsində evlərin həyətlərini su basıb VİDEO

Abşeron rayonunun Saray qəsəbəsində 50-dən çox evin həyətini su basıb.

Xezerxeber.az-ın məlumatına görə, kanalizasiya sularının axdığı göl daşıb və evlərin həyətlərinə dolub.

Ərazidə yaşanan acınacaqlı vəziyyət sakinləri çarəsiz duruma salıb.

Sakinlər bildirirlər ki, ərazidə təqribən 500- dən çox ev var. Bunlardan 50-nin həyətinə çirkab sular dolub.

Göl hətta o qədər böyüyüb ki, avtomobil yolunu da tutub. 

Mövcud məsələ ilə bağlı Bağlar Su Kanal İdarəsindən “Xəzər Xəbər”ə bildirildi ki, ərazi onlara aid olsa da, lakin həmin ünvandan ödənişlər olmadığına görə heç bir xidmət aparılmır.

Abşeron Rayon İcra Hakimiyyətinin Saray qəsəbəsi üzrə icra nümayəndəliyindən isə qeyd olundu ki, həmin gölə elə sakinlərin özləri tərəfindən kanalizasiya suları axıdılır. Buna görə də göldə suyun səviyyəsi tez tez qalxır. Lakin buna baxmayaraq, göl 70 metr uzunluğunda borularla kanalizasiya şəbəkəsinə qoşulub və mütəmadi olaraq nəzarətdə saxlanılır. 

Xezerxeber.az mövzu ilə bağlı daha ətraflı videomaterialı təqdim edir.