Hər kəs bu şagirddən danışır - Fəridi istedadına görə yuxarı sinfə qəbul ediblər VİDEO

Sumqayıtda 8 yaşlı şagird 3-cü sinfi bitirməmiş 4-cü sinfə keçirilib.

Xezerxeber.az-ın məlumatına görə, söhbət Sumqayıt şəhər Mikayıl Müşfiq adına 34 nömrəli tam orta məktəbin 3-cü sinif şagirdi Fərid Babayevdən gedir.

İstedadlı Fərid Babayevi "vunderkind" də hesab etmək olar.

Onun ölkə daxilində keçirilən müxtəlif olimpiadalarda 50-yə yaxın qələbəsi var. Bundan başqa, Fərid Babayev Sərhədsiz Kenquru Assosiasiyasının razılığı ilə dünyanın 80-dən çox ölkəsindən 45 milyon şagirdin iştirak etdiyi Kenquru Beynəlxalq Riyaziyyat Müsabiqəsinin də qalibi olub.

O, həm ilkin, həm də final mərhələsində 100%-lik nəticə ilə qızıl medal qazanıb. Fərid Babayev eyni zamanda ABŞ Riyaziyyat Olimpiadasında da qızıl medal qazanıb və bu uğuruna görə yayda Sinqapurda keçiriləcək olimpiadaya dəvət alıb.

Elm və Təhsil Nazirliyinin qərarı ilə Fərid 3-cü sinifi tam başa vurmadan, əldə etdiyi uğurlara görə, ikinci yarımildən təhsilini 4-cü sinif şagirdi kimi davam etdirir.  

8 yaşlı Fəridin ən böyük arzularından biri elm aləmində yeni kəşfə imza atmaqdır.

İbtidai sinif müəllimi Aygün Güləliyeva şagirdinin uğuruna çox sevinir.  

Xezerxeber.az mövzu ilə bağlı daha ətraflı videomaterialı təqdim edir: