Qida Sənayesi Kollecində tələbələrdən rüşvət alınır? - İDDİA və CAVAB VİDEO

Azərbaycan Dövlət İqtisad Universitetinin (UNEC) nəzdində Qida Sənayesi Kollecində tələbələrin imtahanı zamanı cavabların telefon və dəftərlərdən köçürüldüyü iddia edilir.

Xezerxeber.az-ın məlumatına görə, bununla bağlı kollecin hüquqşünası Aynurə Muradova videogörüntü yayıb.

“Xəzər Xəbər” Aynurə Muradovadan məsələyə münasibət öyrənib. O, üzünün çəkilməsini istəməyib, lakin səsini yazmağa icazə verib. Qeyd edib ki, lentə aldığı kadrlarda  imtahanlarda cavablar telefon və dəftərlərdən köçürülür. Bu isə rüşvət qarşılığında olur.

Hadisədə adı hallanan Kollec direktorunun tədris işləri üzrə müavini Teymuraz Əfəndiyev və tərbiyə işləri üzrə müavini Sevinc Həmzəyeva isə deyilənlərin yalan olduğunu bildirirlər. Onların sözlərinə görə, imtahanlarda tələbələrə telefonların verilməsi kollecin daxili qaydaları əsasında həyata keçirilir. Bu, müəyyən vaxt ərzində olur, imtahan başlayar-başlamaz isə telefonlar uşaqlardan yığılır. Qeyd edilib ki, baş verənlər siniflərdə olan müşahidə kameraları vasitəsilə də izlənilir. Həmin kamera görüntüləri bizə də göstərildi. Həqiqətən də 2-3 dəqiqə ərzində telefonlar tələbələrdən yığışdırılır.

Kollecdə çəkiliş apardığımız zaman orada imtahanların keçirildiyinin şahidi olduq. Eyni proses bu gün də baş verirdi. İmtahandan əvəl tələbələrin telefonları əllərində idi.

Lakin qeyd etmək lazımdır ki, yerli təhsil müəssisələrinin digərlərində belə bir təcrübə yoxdur.

Tərəflər məsələnin tam həlli üçün məhkəməyə müraciət edəcəklərini desələr də, indiyə qədər heç kim ilk addımı atmayıb.

Xezerxeber.az mövzu ilə bağlı daha ətraflı videomaterialı təqdim edir: