Çin Marsdan nümunələr gətirən ilk ölkə ola bilər

Fevralın ortalarında NASA elan edib ki, SHERLOC elmi alətinin iki qapağından birinin qismən açıq olması səbəbindən cihazlardan birində problem yaranıb və onun düzgün işləməməsi səbəbindən “Perseverance” roverinin lazerlə Marsdakı qayaları vurmaq qabiliyyətini itirmək riski var. Bu, elmi məlumat toplamaq fəaliyyətinə mane olur.

Xezerxeber.az xəbər verir ki, yanvarın ortalarında ABŞ-nin kosmik agentliyi “İngenuity” helikopterindən istifadə edərək Qırmızı planetə tarixi missiyasını ləğv etməli olub, çünki eniş zamanı onun rotor qanadlarından biri zədələnib. Kosmik gəmi əvvəlcə Mars atmosferində uçmaq üçün lazım olan texnologiyaların sınaqdan keçirilməsi üçün nəzərdə tutulmuşdu, lakin bu uğursuzluq planetlərarası aviasiyada böyük bir mərhələyə son qoydu.

Bütün bunlar Mars uğrunda kosmos yarışında NASA-nın geridə qaldığını nəzərə alaraq, onu Qırmızı planetdə əməliyyatlar cədvəlini təxirə salmağa məcbur edib.

NASA-nın büdcəsində də qeyri-müəyyənlik ilə də əlaqəli problemlər fonunda Çin Mars süxurlarını toplamaq və onları “Tianwen-3” missiyası ilə 2030-cu ildə Yerə çatdırmaq planını irəli sürüb.

Mars orbitatorunun və “Tianwen-1” roverinin baş konstruktoru Sun Zejounun sözlərinə görə, “Tianwen-3” missiyasının məqsədi "süxur nümunələrinin götürülməsi və sonra Marsın səthindən Yerə geri uçuşdan" ibarətdir. O qeyd edib ki, daha sonra ən müasir alətlərin köməyindən istifadə edəcək alimlər aşağıdakı kimi fundamental suallara daha yaxşı cavab verə biləcəklər; Marsda hələ də su varmı və o, keçmişdə bu planetdə həyatın hər hansı formasını dəstəkləyibmi?

Pekin misli görünməmiş Mars missiyasını yerinə yetirmək istəyini daha əvvəl də bildirib və bu məsələ Çin Milli Kosmik İdarəsinin 2021-2025-ci illər üçün inkişaf planlarına daxil edilib.