Sahələrdən yığılan taxılın həcmi açıqlanıb

Bugünədək ölkə üzrə taxıl zəmilərinin 85 faizində biçin prosesi başa çatıb.

Kənd Təsərrüfatı Nazirliyindən Xezerxeber.az-a bildirilib ki, arpa sahələrinin 95,8 faizində, buğda sahələrinin isə 77,2 faizində biçin tam yekunlaşıb.

Sahələrdən 2 milyon 691 min 552 ton məhsul yığılıb. Yığılan məhsulun 1 milyon 492 min 746 tonu buğda, 1 milyon 198 min 806 tonu isə arpadır. Buğda üzrə orta məhsuldarlıq 33 sentner, arpa üzrə məhsuldarlıq isə 29,4 sentner təşkil edir. Ümumilikdə taxıl üzrə orta məhsuldarlıq 31,3 sentnerə çatıb.

Hazırda aktiv biçin dağlıq və dağətəyi ərazilərdə aparılır. Biçin prosesinə 925 kombayn cəlb olunub. Bunlardan 282-si “Aqroservis” ASC-nin, 643 kombayn isə fiziki və hüquqi şəxslərin balansında olan texnikalardır.

İyunun 16-da aktiv biçin gedən bölgələrdən Cəlilabadda 164, Qobustanda 84, Qusarda 74, Şamaxıda 55, Füzulidə 54, Qubada 45 kombayn biçin prosesinə cəlb olunub. Ötən ilin müvafiq dövrü ilə müqayisədə mexanizatorlar tərəfindən 60 min 148 hektar sahədə daha çox biçin həyata keçirilib.

Biçin prosesi davam edir.