Dünyada ərzaq ucuzlaşır

Birləşmiş Millətlər Təşkilatının Ərzaq və Kənd Təsərrüfatı Təşkilatının (FAO) məlumatına görə, yanvar ayında ötən ay ilə müqayisədə ərzaq qiymətləri indeksi 1 faiz, 2023-cü ilin analoji dövrü ilə müqayisədə isə 10,4 faiz ucuzlaşıb.

Xezerxeber.az təşkilatın saytına istinadla xəbər verir ki, dekabr ayı səviyyəsi ilə müqayisədə taxılın qiymət indeksinin dəyəri 2,2 faiz azalıb. İxracatçılar arasında gərgin rəqabət və Cənub yarımkürəsi ölkələrindən məhsulun bazara çıxarılması fonunda buğdanın qiyməti aşağı düşüb. Qarğıdalı məhsulunun bol olması və Argentinada yığım kampaniyasının başlaması, həmçinin Amerika Birləşmiş Ştatlarında tədarükün artması səbəbindən ucuzlaşma davam edib.

Bunun əksinə, yüksək keyfiyyətli Hindistan sortlarına güclü ixrac tələbi və İndoneziyadan əlavə tədarüklər nəticəsində yanvar ayında qlobal düyü kotirovkaları 1,2 faiz artıb.

Bitki yağının qiymət indeksinin yanvar ayında dəyəri dekabr ayı göstəricisindən cəmi 0,1 faiz çoxdur və ötən ilin eyni dövründə qeydə alınan müvafiq dəyərdən hələ də 12,8 faiz aşağıdır. Xurma və günəbaxan yağlarına dünya kotirovkalarının nisbətən artması soya və kolza yağlarının qiymətlərində ucuzlaşmanı kompensasiya edib. Palma yağının qiymətləri əsas istehsalçı ölkələrdə hasilatın mövsümi azalması və Malayziyadakı əlverişsiz hava şəraiti fonunda artıb.

Günəbaxan yağının dünya qiymətləri də bahalaşıb ki, bu da idxal tələbinin artması ilə əlaqədar olub. Digər tərəfdən, soya və kolza yağlarının dünya kotirovkaları Cənubi Amerikada proqnozlaşdırılan əhəmiyyətli tədarük və Avropa bazarlarında böyük ehtiyatların qalması səbəbindən aşağı düşüb.

Süd məhsullarının qiymətləri ay ərzində demək olar ki, dəyişməyib, lakin onların dəyəri ötən ilin müvafiq göstəricisindən 17,8 faiz aşağı olaraq qalır. Kərə yağı və tam yağlı süd tozu Asiya ölkələrində tələbatın artması ilə əlaqədar olaraq, habelə yağsız süd tozu və pendirin kotirovkalarının aşağı düşməsini kompensasiya edərək bahalaşıb.

Ardıcıl olaraq yeddinci aydır ki, ət qiymətləri indeksi dekabr səviyyəsindən 1,4 faiz ucuzlaşıb, aparıcı ixracatçı ölkələrin əhəmiyyətli tədarükü quş əti, mal əti və donuz əti üçün qlobal kotirovkaların aşağı düşməsinə səbəb olub. Quzu ətinin qiymətləri isə əksinə, dünyada yüksək idxal tələbi və Okeaniyada kəsimə verilən heyvanların sayının azalması səbəbindən artıb.

Yanvar ayında şəkər ötən ilin analoji dövrü ilə müqayisədə 0,8 faiz bahalaşıb. Qiymətlərə təsir edən əsas amillər Braziliyada yayın quraq keçməsi, habelə Tailand və Hindistanda istehsalın həcmi ilə bağlı mənfi proqnozlardır.