Azərbaycan Prezidentinə təbriklər gəlməkdə davam edir MƏKTUB/YENİLƏNİB

Azərbaycan Respublikasının Prezidenti Zati-aliləri cənab İlham Əliyevə

Möhtərəm İlham Heydər oğlu!

İcazə verin, Sizə hörmət və ehtiramımı bildirərək, Zati-alinizi ölkənizin Müstəqillik Günü münasibətilə səmimi-qəlbdən təbrik edim.

Bu bayram öz ölkəsini sevən, onun tarixinə və qədim ənənələrinə hörmət bəsləyən və layiqli gələcəyi naminə çalışan Azərbaycan Respublikasının bütün vətəndaşlarını birləşdirir.

Bu əlamətdar gündə Sizə və Azərbaycan Respublikasının bütün vətəndaşlarına möhkəm cansağlığı, səadət, firavanlıq və doğma Vətənin rifahı naminə işlərində yeni-yeni nailiyyətlər arzulayıram.

Azərbaycan Respublikası qarşılıqlı fəaliyyətin bütün istiqamətləri üzrə, o cümlədən regionlararası səviyyədə Rusiya Federasiyasının həmişə strateji tərəfdaşı olub və olmaqda davam edir. Həştərxan vilayəti ilə Azərbaycan Respublikası arasında mövcud olan dostluq əlaqələrini yüksək dəyərləndirir və çoxplanlı qarşılıqlı təmasların möhkəmləndirilməsinə göstərdiyiniz dəstəyə görə Sizə səmimi minnətdarlığımı bildirirəm.

Dərin hörmətlə,

İqor Babuşkin

Rusiya Federasiyasının Həştərxan vilayətinin qubernatoru

***

Azərbaycan Respublikasının Prezidenti Zati-aliləri cənab İlham Əliyevə

Möhtərəm İlham Heydər oğlu!

Azərbaycan Respublikasının Müstəqillik Günü münasibətilə səmimi təbriklərimi qəbul edin.

Azərbaycan dünya birliyi dövlətləri ilə mehriban qonşuluq və qarşılıqlı faydalı münasibətlərin möhkəmləndirilməsinə yönələn dəyişməz kurs sayəsində layiqli nüfuz qazanıb, ardıcıl olaraq müstəqil xarici siyasət apararaq beynəlxalq münasibətlərin fəal subyektinə çevrilib.

Sizin rəhbərliyinizlə iqtisadiyyatda, sosial və ictimai-siyasi sahələrdə həyata keçirilən böyük dəyişikliklər ölkənin gələcək inkişafına və onun əhalisinin rifahının artmasına kömək edir.

Əminəm ki, MDB məkanında inteqrasiya məsələlərinə Sizin şəxsi diqqətiniz Birliyimizin iştirakçı-dövlətləri arasında strateji tərəfdaşlıq əlaqələrinin möhkəmlənməsinə bundan sonra da kömək olacaq.

Möhtərəm İlham Heydər oğlu, Sizə möhkəm cansağlığı, rifah və çoxşaxəli dövləti fəaliyyətinizdə uğurlar, Azərbaycan xalqına isə əmin-amanlıq və tərəqqi arzulayıram.

Dərin hörmətlə,

Sergey Lebedev

Müstəqil Dövlətlər Birliyinin Baş katibi

***

Azərbaycan Respublikasının Prezidenti Zati-aliləri cənab İlham Əliyevə

Çox hörmətli İlham Heydər oğlu!

Atanız Heydər Əliyevin 100 illik yubileyi münasibətilə səmimi təbriklərimi qəbul edin.

Bu əlamətdar günlərdə biz görkəmli dövlət xadimi, Azərbaycan xalqının Ümummilli Lideri, bütün dünyada hörmət və etibar qazanmış Heydər Əliyevi qürur hissi ilə xatırlayırıq. O, bu gün bizimlə olmasa da, onun irsi Qafqaz xalqlarının, bu böyük insanı tanıyan və ona hörmət edənlərin qəlbində və düşüncələrində yaşayır.

Heydər Əliyev dərin etiqad və prinsiplərə malik insan idi. Azərbaycanın müstəqilliyinin əbədi olması üçün onun göstərdiyi böyük səylər bu dahi şəxsiyyətin siyasətinin əsas prinsipi idi. Bu prinsip Azərbaycan xalqını ruhlandırmaqda davam edir. Siyasət və dövlət xadimi kimi, Heydər Əliyev təkcə qətiyyətli və xarizmatik lider deyil, həm də öz xalqının rifahına qayğı göstərən dərin mərhəmətli insan idi. Onun rəhbərliyi və insanlarla ümumi dil tapmaq bacarığı Azərbaycana bir çox çətinlikləri aşmağa və irəli getməyə imkan verdi.

Qeyd etmək istərdim ki, Rusiya Federasiyasının Çeçenistan Respublikası və Azərbaycan Respublikası arasında münasibətlər məhz Heydər Əliyev və Çeçenistan Respublikasının birinci Prezidenti, Rusiya Qəhrəmanı Əhməd-Hacı Kadırovun əsasını qoyduqları çoxdankı ənənələrə söykənir. Bu iki görkəmli şəxsiyyət xalqlarımızın mənəvi və mədəni əlaqələrinin möhkəmlənməsi üçün çoxlu iş görüblər.

Bu gün xalqlarımız arasında qardaşlıq münasibətləri yalnız möhkəmlənir və inkişaf edir. Bu, o cümlədən hazırkı liderlər - Çeçenistan Respublikasının rəhbəri, Rusiya Qəhrəmanı Ramzan Kadırov və Azərbaycan Respublikasının Prezidenti İlham Əliyevin sıx əlaqələri sayəsində baş verir.

Cənab Prezident biz inanırıq ki, Azərbaycan Sizin rəhbərliyinizlə daha böyük uğurlar əldə edəcəkdir.

Heydər Əliyevin xatirəsi qəlblərdə əbədi yaşayacaqdır. Qoy, onun nümunəsi azərbaycanlıların gələcək nəsillərini və sülhə, inkişafa, xalqlar arasında əməkdaşlığa can atan hər kəsi ruhlandırsın!

Xeyirxah dualar və ən yaxşı arzularla,

Şeyx Salah-Hacı Mejiyev

Rusiya Federasiyası Çeçenistan Respublikasının müftisi

***

Bolqarıstan Respublikasının Prezidenti Rumen Radev Azərbaycan Respublikasının Prezidenti İlham Əliyevə məktub göndərib.

Xezerxeber.az xəbər verir ki, məktubda deyilir:

“Hörmətli cənab Prezident!

Keçmiş Sovet İttifaqı dağılandan sonra ilk dəfə ölkənizin dünya bazar münasibətlərinə yolunu açan, demokratiyanı bərpa edən, eləcə də Azərbaycan xalqının davamlı inkişafının və firavanlığının əsaslarını qoyan Ümummilli Lider Heydər Əliyevin anadan olmasının 100 illiyi münasibətilə təbriklərimi qəbul edin. 2023-cü ilin “Heydər Əliyev İli” elan edilməsi müasir müstəqil Azərbaycanın qurucusunun əməyinə dərin hörmət və ehtiramın ifadəsidir.

İcazə verin, bu əlamətdar fürsətdən istifadə edərək, Bolqarıstan Respublikasının Azərbaycan Respublikası ilə strateji tərəfdaşlıq səviyyəsinə yüksəldilmiş mövcud mükəmməl ikitərəfli münasibətlərini yüksək qiymətləndirdiyimi bir daha təsdiqləyim və bunun gələcəkdə də fəal surətdə inkişafı üçün arzularımı ifadə edim.

Hörmətli cənab Prezident, Sizə möhkəm cansağlığı arzularımı, məsuliyyətli işinizdə uğurlar diləyimi və ən yüksək ehtiramımı qəbul edin”.

***

İspaniyanın Kralı VI Felipe Prezident İlham Əliyevə təbrik məktubu göndərib.

Xezerxeber.az xəbər verir ki, məktubda deyilir:

"Cənab Prezident!

Azərbaycan Respublikasının milli bayramı – Müstəqillik Günü münasibətilə Zati-alinizə öz adımdan, İspaniya hökuməti və xalqı adından ən səmimi təbriklərimi çatdırıram.

Cənab Prezident, Sizə möhkəm cansağlığı, istəkli Azərbaycan xalqına isə sülh və rifah arzu edirəm".

***

Koreya Respublikasının Prezidenti Yun Sok Yol Prezident İlham Əliyevə təbrik məktubu ünvanlayıb.

Xezerxeber.az xəbər verir ki, təbrikdə deyilir:

"Zati-aliləri!

Ölkənizin Müstəqillik Günü münasibətilə Sizə və Azərbaycan Respublikası vətəndaşlarına səmimi təbriklərimi çatdırmaq istəyirəm.

Ötən illər ərzində ölkələrimiz güclü əməkdaşlıq və tərəfdaşlıq əlaqələri qurmuşdur. Ölkələrimiz arasında münasibətləri daha da inkişaf etdirəcəyimizə və xalqlarımızın mövcud dostluğunu daha da möhkəmləndirəcəyimizə ümid edirəm.

Bu xoş fürsətdən istifadə edərək, Sizə cansağlığı və xoşbəxtlik, Azərbaycan Respublikasına daimi firavanlıq arzu edirəm".