Sibiqa: Ukrayna Avropa İttifaqının xarici və müdafiə siyasətinə 100 faiz əməl edib

“Ukrayna Avropa İttifaqının (Aİ) xarici və müdafiə siyasətinə 100 faiz əməl edib. Bu, tarixi nəticədir”.

Xezerxeber.az xəbər verir ki, bu barədə Ukraynanın xarici işlər naziri Andrey Sibiqa bildirib. Onun sözlərinə görə, Ukraynanın Aİ-nin xarici siyasət bəyanatlarına və qərarlarına uyğunluğu 2024-cü ildə 95 faiz, 2025-ci ilin ilk aylarında isə 100 faiz olub.

“Bu, Avropa İttifaqının martın əvvəlində başa çatdırdığı “Xarici, Təhlükəsizlik və Müdafiə Siyasəti” bölməsi üzrə Ukrayna qanunvericiliyinin nəzərdən keçirilməsi zamanı təsdiqlənib”, - deyə nazir əlavə edib.

Sibiqanın fikrincə, bu qeyri-adi nailiyyət Ukraynanın Avropa İttifaqına sadiqliyini əks etdirir.

Qeyd edək ki, Ukraynanın Aİ-yə daxil olması ilə bağlı danışıqlar 2023-cü il dekabrın 14-də Avropa İttifaqı ölkələrinin liderlərinin sammit zamanı təsdiqlənib.