Ukrayna ordusu Kurskda bir neçə istiqamətdə hücuma başlayıb YENİLƏNİB

Rusiya Müdafiə Nazirliyi Ukrayna Silahlı Qüvvələrinin Kursk vilayətində genişmiqyaslı hücuma başlaması barədə məlumatları təsdiqləyib.

Xezerxeber.az xəbər verir ki, Rusiya Müdafiə Nazirliyi bunu Rusiya qoşunlarının irəliləməsini dayandırmaq üçün əks-hücum kimi qiymətləndirib.

Qeyd edilib ki, Moskva vaxtı ilə saat 09:00 radələrində Rusiya qoşunlarının Kursk istiqamətində irəliləyişini dayandırmaq üçün Ukrayna Silahlı Qüvvələri əks hücuma keçib.

Bildirilib ki, Rusiya Silahlı Qüvvələri Kursk vilayətinin Berdin xutor yaşayış məntəqəsi istiqamətində hücuma cəhd edən Ukrayna Silahlı Qüvvələrinin iki tank və hərbçilərlə birlikdə 12 zirehli texnikadan ibarət hücum qrupunu darmadağın edib.

Ukrayna qoşunlarının hücumunun dəf edilməsi əməliyyatının davam etdirildiyi açıqlanıb.

15:46

Ukrayna müdafiə qüvvələri Kursk bölgəsində bir neçə istiqamətdə əks-hücuma keçib.

Xezerxeber.az xəbər verir ki, bu barədə Ukrayna Dezinformasiyaya Qarşı Mübarizə Mərkəzinin rəhbəri Andrey Kovalenko özünün teleqram səhifəsində bildirib.

Ukrayna Prezident Ofisi Aparatının rəhbəri Andrey Yermak da teleqram səhifəsində Ukrayna qüvvələrinin Rusiya ərazisindəki uğurlarından yazıb.

“Kursk bölgəsindən yaxşı xəbər, Rusiya layiq olduğu cavabı alır”, - deyə Yermak əlavə edib.