Britaniya “Vaqner” silahlı qrupunu terror təşkilatı kimi tanımağa hazırlaşır

Britaniya hökuməti yaxın həftələrdə "Vaqner" silahlı qrupunu terror təşkilatı kimi tanımağa hazırlaşır.

Xezerxeber.az xəbər verir ki, bu barədə “The Times” qəzeti məlumat yayıb.

Bildirilib ki, Böyük Britaniya hakimiyyəti iki aydır Rusiyaya təzyiq göstərmək məqsədilə “Vaqner”i terror təşkilatları siyahısına salmaq üçün hüquqi əsaslar hazırlayır. “Vaqner”ə müvafiq statusun verilməsi Böyük Britaniyada təşkilata mənsub olmağı, onun təşkil etdiyi tədbirlərdə iştirakı, ona dəstəyi ifadə etməyi və ya onun simvollarını taxmağı cinayət sayır.

Bundan əlavə, silahlı qrupa qarşı maliyyə sanksiyaları tətbiq oluna bilər. Təşkilat üzvlərinə Britaniya məhkəmələrində jurnalistlərə və hüquq müdafiəçilərinə qarşı iddialar irəli sürmək qadağan edilə bilər.