Əhaliyə verilən sosial ödənişlərin həcmi artıb

2023-cü ilin yanvar-fevral aylarında pensiya, müavinət, təqaüd və ünvanlı dövlət sosial yardımları üzrə əhaliyə ötən ilin müvafiq dövrünə nisbətən 207 milyon manat və ya 19,1 faiz çox olmaqla 1 milyard 288 milyon manat ödənilib.

Əmək və Əhalinin Sosial Müdafiəsi Nazirliyindən Xezerxeber.az-a verilən məlumata görə, həyata keçirilən yeni sosial islahat paketi çərçivəsində 2023-cü ilin əvvəlindən müavinət və təqaüdlər növbəti dəfə artırılaraq, minimum pensiya fevralın 1-dən 240 manatdan 280 manata çatdırılıb.

Həmçinin 2022-ci ildə pensiyaçılara verilən maddi yardımlar bu ilin əvvəlindən onların pensiyaları tərkibinə daxil edilib və həmin artım edildikdən sonra həmin pensiyalar ötən il üzrə orta aylıq əməkhaqqının illik artım tempinə uyğun olmaqla 14,7 faiz indeksləşdirilərək artırılıb.