SOS: Buzlaşma dövrünə qayıdırıq İki fəsil sıradan çıxır

"Azərbaycanda yaz və payız fəsilləri tədricən sıradan çıxır. Bu, buzlaşma dövrü ilə əlaqədardır”.

Bunu AzVision.az-a açıqlamasında Milli Ekoloji Proqnozlaşdırma Mərkəzinin rəhbəri Telman Zeynalov deyib.

Bu il ölkəmizdə qış fəslinin sərt keçdiyini deyən T.Zeynalovun sözlərinə görə, buzlaşma dövründə yaz və payız fəsillərinin sıradan çıxması gözləniləndir.

"Artıq payız və yaz fəsilləri öz müddətini itirir və tədricən sıradan çıxır. Biz birbaşa qışdan yaya, yaydan isə qışa keçirik. Azərbaycanda yay fəslində dayanmadan yağış yağması, dolu düşməsi, havaların sərin keçməsi buna nümunədir”.

T.Zeynalov hesab edir ki, bu il Azərbaycanda yay fəsli sərin və yağışlı keçəcək: "İyul, avqust aylarında bir həftə hava isti olacaq, sonra yenidən soyuqlar başlayacaq. Buzlaqlar əridikcə okeanın suyu soyuyur. Su soyuduqca isə qasırğa, tufan, daşqın olur. Bu, təbiətin qanunudur. Hər 70 ildən bir hava şəraiti dəyişir. Biz artıq 5-ci buzlaşma dövrünə gedirik.

Son illər ölkədə yay fəslində havanın temperaturu normadan aşağı olur. Sebtyabr ayına qədər ola bilsin ki, havalar isti keçsin. Lakin oktyabrda artıq sərt soyuqlar olacaq. Ötən il oktyabrda hamı paltoya keçmişdi. Bu il də belə olacağı qaçılmazdır”.

Qeyd edək ki, Azərbaycanda son günlər yağışlı hava şəraiti müşahidə edilir.