Heyvandarlığın inkişafına dair Dövlət Proqramı hazırlanır

Kənd təsərrüfatı naziri İnam Kərimov Azərbaycan Süd İstehsalçıları və İxracatçıları Assosiasiyasının üzvləri ilə görüşüb.

Nazirliyin İctimaiyyətlə əlaqələr və informasiya təminatı şöbəsindən xezerxeber.az-a bildiriblər ki, görüşdə ölkədə heyvandarlığın inkişafı məsələləri ətrafında qarşılıqlı fikir mübadiləsi aparılıb. Nazir fermerlərə yaxın olmaq prinsipinə əsaslanaraq kənd təsərrüfatı sahəsində ixtisaslaşmış assosiasiyaların üzvləri ilə mütəmadi görüşlər keçirdiyini bildirib. Qeyd edib ki, bu cür görüşlərin keçirilməsində məqsəd aqrar sektorun davamlı inkişafını təmin etməkdir.

Görüşdə assosiasiya üzvlərinə nazirlikdə yeni yaradılmış fermerlər, kooperativlər və assosiasiyalarla iş şöbəsinin və Dövlət Aqrar Ticarət Şirkətinin fəaliyyəti haqqında məlumat verilib. Bildirilib ki, nazirlik tərəfindən Azərbaycanda heyvandarlığın inkişafına dair Dövlət Proqramı hazırlanır.

Müzakirələrdə iştirak edən "MPRO”, "Biləsuvar aqro”, "Amal” şirkətlərinin, "SANİ”, "Bozdağ”, "Real İnkişaf”, Beyləqan və Tərtər fermer təsərrüfatlarının "Gilan Diary Farms”, "Nüsr Ət aqro” "Yalama Aqropark” məhdud məsuliyyətli cəmiyyətlərinin, "Bərdə RVR LTD”nin "Çiçək” süd fermer təsərrüfatının, Türk Qida Sənaye Birliyinin təmsilçiləri dövlət proqramı layihəsinin hazırlanması təşəbbüsünü dəstəkləyiblər. Səsləndirilən təkliflərin Assosiasiya üzvləri ilə növbəti görüşlərdə bir daha müzakirə olunması, uyğun təkliflərin heyvandarlığın inkişafına dair Dövlət Proqramı layihəsinə daxil edilməsi qərara alınıb.