Azərbaycanın milli valyutası beynəlxalq təsirlərdən yaranmış iqtisadi böhrandan uğurla qurtulub
"2017-ci ildə
Azərbaycan makroiqtisadi sabitliyin təmin edilməsi və əhalinin milli
valyutaya inamının bərpası prosesinin ilk mərhələsinin yekunu üzrə
qarşıya qoyulan məqsədlərə çatıb”. Bunu Azərbaycanın maliyyə naziri
Samir Şərifov Milli Məclis komitələrinin 2018-ci il dövlət büdcəsi və
icmal büdcə layihələrinin müzakirəsində deyib. Nazir qeyd edib ki, bu,
dövlət başçısının rəhbərliyi ilə həyata keçirilən siyasi və iqtisadi
tədbirlər sayəsində mümkün olub.
Mütəxəssislərin rəyinə görə, 2017 -ci ildə Mərkəzi Bank beynəlxalq
konyunkturun nisbətən yaxşılaşması və qeyri-neft sektorunda iqtisadi
artımın bərpası şəraitində fəaliyyət göstərib.
OPEC ölkələrinin, o cümlədən Azərbaycanın neft hasilatının tənzimlənməsi
sahəsində apardıqları məqsədyönlü siyasət sayəsində neftin dünya
qiymətində yüksəlmə baş verib. Təbii ki, keyfiyyətli Azərbaycan neftinin
də qiyməti qalxıb və bunun nəticəsi kimi ölkəyə daxil olan valyutanın
miqdarı çoxalıb. Amma daha mühüm amil hökumətin qeyri-neft sektorunun
inkişafı üzrə həyata keçirdiyi tədbirlər sayəsində baş verib. Belə ki,
əsasən istehlak malları, toxuculuq və yeyinti malları sahəsində idxalın
azalması, bununla yanaşı ixrac məhsullarının həcminin artması valyuta
gəlirlərinə müsbət təsir edib və bunun nəticəsində ölkənin tədiyyə
balansında profisit bərpa olunub, strateji valyuta ehtiyatları artıb.
Cari ilin 9 ayında Mərkəzi Bankın həyata keçirdiyi antiinflyasiya
xarakterli pul siyasəti də vəziyyətin müsbətə doğru dəyişməsində
əhəmiyyətli rol oynayıb. Belə ki, pul təklifi gələn mənbələrin effektiv
idarə edilməsi istiqaməti götürülüb və adekvat faiz siyasəti yürüdülüb.
Faiz dəhlizinin parametrləri iqtisadi tsikl göstəriciləri, xüsusən də
inflyasiyanın dinamikası, maliyyə bazarlarının müxtəlif seqmentlərində
gedən proseslər nəzərə alınmaqla müəyyənləşdirilib. MB tərəfindən pul
siyasətinə dair qərarlar qəbul edilərkən transmissiya xüsusiyyətləri
nəzərə alınıb. Prosesin uğurlu alınmasında pul siyasətinin strateji
çərçivəsinin daim diqqətdə saxlanılması və təkmilləşdirilməsi
ardıcıllığın qorunmasına səbəb olub. İl ərzində milli valyutanın
məzənnəsi valyuta bazarında tələb-təklif nisbətindən asılı olaraq
formalaşıb.
Vəziyyəti iqtisadi qaydalar çərçivəsində qiymətləndirəndə görünür ki,
tədiyyə balansının profisiti şəraitində valyuta bazarında təklifin
tələbi üstələməsi nəticəsində milli valyutanın məzənnəsinin
möhkəmlənməsi dollarlaşma səviyyəsinin aşağı düşməsi ilə müşayiət
olunur. Bu tendensiya iqtisadiyyatda gözlənilən inflyasiyanın
səviyyəsinə azaldıcı təsir edib. Ümumilikdə, iqtisadi siyasət üzrə
həyata keçirilən tədbirləri nəticəsində 2017-ci ilin 9 ayında
makroiqtisadi sabitliyin təmin olunması istiqamətində müsbət meyillər
formalaşıb və güclənib.
Gələn ilin dövlət büdcəsi layihələşdirilərkən baş vermiş irəliləyiş
nəzərə alınıb. Azərbaycanın 2018-ci il dövlət büdcəsinin gəlirləri
20,127 milyard, xərcləri isə 20,905 milyard manat səviyyəsində
proqnozlaşdırılır. Neftin qiyməti dövlət büdcəsində ötənilki səviyyədən
artıq - 45 dollar/barel qeyd edilib.
Bütün bunlar əhalinin manata olan münasibətinə də yaxşı mənada güclü
təsir edib. Uzun müddətdir ki, manatla xarici valyutaların mübadiləsində
davam edən sabitlik ailə büdcəsinin olunmasını asanlaşdırıb. Faktiki
olaraq iqtisadi təbəddülatların insanlara gətirdiyi narahatlıq əsasən
aradan götürülüb. Xüsusilə, ölkə başçısının gələn il maaş və
pensiyaların artırılacağı badərə verdiyi anons əhali tərəfindən rəğbətlə
qarşılanmaqla yanaşı milli valyutaya olan ümidi daha da gücləndirib. Bu
həm də Azərbaycan milli valyutasının kənar təsirlərlə mübarizədən qalib
çıxmasının göstəricisidir./movqe.az