Bu gün kənd təsərrüfatı
nazirinin müavini İlham Quliyev ABŞ-ın Azərbaycandakı səfirinin müavini
Uilyam Qil və ABŞ-ın Ankaradakı Ticarət Xidmətinin rəhbəri, ticarət
müşaviri Bill Çaykovskinin rəhbərlik etdiyi nümayəndə heyəti ilə
görüşüb.
Kənd Təsərrüfatı Nazirliyindən
XəzərXəbər-ə bildirilib ki, görüşün məqsədi iki ölkə arasında kənd təsərrüfatının
müxtəlif istiqamətləri üzrə əməkdaşlıq imkanlarının, eləcə də kənd
təsərrüfatı məhsullarının istehsalı, emalı və bu sahədə sərmayə
qoyuluşunun müzakirəsi olub.
İ.Quliyev deyib ki, ABŞ-la
Azərbaycan arasında iqtisadiyyatın bütün sahələrində olduğu kimi, kənd
təsərrüfatı sahəsində də əlaqələr yeni müstəvidə inkişaf edəcək. O,
dünyada mövcud olan 11 iqlim tipindən 9-nun Azərbaycanda mövcud olduğunu
və ölkəmizdə istehsal olunan kənd təsərrüfatı məhsullarının ekoloji
baxımdan keyfiyyətliliyini nəzərə çatdırıb.
İ.Quliyev bildirib ki,
Azərbaycan neft ölkəsi olsa da, hal-hazırda ölkə başçısı tərəfindən
qeyri neft sektorunun inkişafına böyük diqqət yetirir. Bu məqsədlə
dövlət tərəfindən strateji proqramlar, regionlarda sərmayə qoyuluşunu
genişləndirmək üçün infrastruktur layihələr həyata keçirilir. Nazir
müavini həmçinin Azərbaycanda fermer və sahibkarların torpaq vergisi
istisna olmaqla bütün vergilərdən azad olunduğunu, gübrələrin 70%, kənd
təsərrüfatı texnikalarının 40% güzəştlə verildiyini, heyvandarlığın cins
tərkibinin yaxşılaşdırılması məqsədilə Göygöl rayonunda ən müasir texnologiyalara uyğun Süni Mayalanma Mərkəzinin tikildiyini qonaqların diqqətinə çatdırıb.
Nazir müavini ABŞ-ın iş adamları üçün Azərbaycanda ekoloji, təmiz kənd təsərrüfatı məhsullarının istehsalı üçün əlverişli investisiya mühitinin olduğunu bildirib. O, ABŞ-ın
JOHN DEERE şirkəti ilə əməkdaşlığın yüksək səviyyədə olduğunu, JOHN
DEERE şirkəti ilə əməkdaşlığı daha da genişləndirmək məqsədi ilə işçi
qrupunun yaradıldığını və yaxın günlərdə qurupun geniş tərkibdə
toplantısının keçiriləcəyini diqqətə çatdırıb.
İlham Quliyev FAO-nun
Azərbaycanda Tərəfdaşlıq və Əlaqələndirmə ofisi ilə də sıx əlaqələrin
olduğunu və birgə layihələrin həyata keçirildiyini, həmçinin fermerlərin
bu layihələrdən faydalandığını qeyd edib. Qəbula görə minnətdarlığını
bildirən Uilyam Qil Azərbaycan ilə ABŞ arasında kənd təsərrüfatı sahəsində əlaqələrin inkişaf etməsi üçün öz səylərini əsirgəməyəcəyini bildirib.