Bir neçə elektrik stansiyası özəlləşdirilə bilər

"Milli iqtisadiyyat və iqtisadiyyatın əsas sektorları üzrə strateji yol xəritələrinin təsdiq edilməsi haqqında" prezidentin 6 dekabr 2016-cı il tarixli 1138 nömrəli fərmanı ilə təsdiq edilmiş Strateji Yol Xəritələrinin icrasının təmin edilməsi məqsədi ilə Əmlak Məsələləri Dövlət Komitəsi sədrinin 23 dekabr 2016-cı il tarixli 219 nömrəli əmri ilə müvafiq komissiya yaradılıb və komissiyaya komitənin icraçı olduğu tədbirlər üzrə Tədbirlər Planının hazırlanması həvalə edilib.

Bu barədə "Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsinin icra vəziyyəti"nin yarımillik monitorinq və qiymətləndirmə hesabatında qeyd edilib.

Sənəddə deyilir ki, komissiya tərəfindən hazırlanmış təkliflər əsasında Əmlak Məsələləri Dövlət Komitəsi sədrinin 17 fevral 2017-ci il tarixli 36 nömrəli əmri ilə komitənin əsas icraçı olduğu hər bir istiqamət üzrə işçi qruplar yaradılmış (cəmi 11 işçi qrup), digər icraçı olduğu tədbirlər üzrə nümayəndələr müəyyən edilərək, aidiyyəti dövlət qurumlarına məlumatlar verilib.

İşçi qruplardan biri də "Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsi"nin Tədbirlər Planı hissəsində əksini tapmış "Elektrik stansiyalarının özəlləşdirmə imkanlarının nəzərdən keçirilməsi" adlı 3.1.2-ci yarımbəndin icrasının tənzimlənməsi məqsədi ilə yaradılıb. 9 nəfərdən ibarət işçi qrupun tərkibinə Komitənin nümayəndələri ilə yanaşı, İqtisadiyyat Nazirliyi, Energetika Nazirliyi və "Azərenerji" ASC-nin də nümayəndələri daxil edilib.

Cari ilin may ayında işçi qrupun ilk iclası keçirilib, iclasda tədbirin icrası ilə bağlı qrup üzvləri arasında fikir mübadiləsi aparılıb, qrupun 2017-ci il üçün iş proqramı qəbul edilib, gələcək yanaşma və addımlar müzakirə olunub. İşçi qrup üzvlərinin yekdil rəyinə əsasən, elektrik stansiyalarının özəlləşdirmə imkanlarının nəzərdən keçirilməsi sahəsində pilot layihə kimi 1-2 elektrik stansiyası seçilməli, onların dövlətsizləşdirmə və restrukturizasiya strategiyası müəyyən edilməli, sonradan isə Komitə tərəfindən konkret tədbirlərin icrasına başlanılmalıdır. Öz növbəsində bu işlərin görülməsi məqsədi ilə nüfuzlu beynəlxalq məsləhətçi şirkətin imkanlarından istifadə olunmalıdır.

Qeyd etmək lazımdır ki, Maliyyə Nazirliyinin məlumatına əsasən Asiya İnkişaf Bankının dəstəyi ilə "Enerji sektorunda özəl sektorun iştirakı üçün əlverişli mühitin formalaşdırılması üzrə texniki yardım proqramı" reallaşdırılmaqdadır və bu məqsədlə "PPA Energy" məsləhətçi şirkəti tərəfindən artıq birinci mərhələ üzrə işlər yekunlaşdırılıb. Hazırda məsləhətçi şirkət tərəfindən ikinci mərhələnin icrasına başlanılması üçün Azərbaycan hökumətindən elektrik enerjisi sektorunda pilot layihənin (yeni elektrik stansiyasının tikintisi üçün investorların cəlb edilməsi, mövcud elektrik stansiyalarından birinin idarəetməyə verilməsi və ya özəlləşdirilməsi və s.) seçilməsi xahiş edilib.

Bununla bağlı, Əmlak Məsələləri Dövlət Komitəsi sözügedən yanaşmanı dəstəkləyib və bu məqsədlə aidiyyəti dövlət qurumlarının və "PPA Energy" məsləhətçi şirkətinin nümayəndələrinin iştirakı ilə işçi qrup, pilot layihə müəyyən edildikdən sonra isə Layihə İdarəetmə Qrupunun yaradılmasını Nazirlər Kabinetinə təklif edib.

Layihə İdarəetmə Qrupu tərəfindən hazırlanacaq dövlətsizləşdirmə strategiyasına uyğun olaraq, Əmlak Məsələləri Dövlət Komitəsi seçilmiş stansiya və ya stansiyaların açıq səhmdar cəmiyyətinə çevrilməsi və onların səhmlərinin satışı və ya idarəetməyə verilməsi tədbirlərinin icrasını təmin edəcək.