Xəzər Xəbər

Rusiya boksçuları Olimpiadaya milli bayraqsız getməkdən imtina ediblər

İdman | 10:20 • 11 Dekabr 2019
Rusiya boksçuları Olimpiadaya milli bayraqsız getməkdən imtina ediblər

Boks üzrə Rusiya yığması 2020-ci ildə Yaponiyanın paytaxtı Tokioda keçiriləcək Yay Olimpiya Oyunlarında milli bayraqsız iştirakdan imtina edib.


Bunu ölkənin boks federasiyasının baş katibi Umar Kremlyov açıqlayıb.


O bildirib ki, boksçular ölkənin bayrağı olmadan yarışa qatılmaq istəmirlər: "Milli komanda Olimpiya Oyunlarına bayraqsız getməkdən imtina edib. Boksçular xahiş edir ki, məhkəmələr vasitəsilə bayraq altında çıxış etmək hüququna nail olaq”.


Qurum rəsmisi bildirib ki, Milli Olimpiya Komitəsi və Rusiya Antidopinq Agentliyinin atacağı addımları izləyəcək federasiya durumu təhlil edəcək. Onlar rusiyalı boksçuların bayraq altında çıxış etməsini və himnin çalınmasını vacib sayır: "Bunsuz iştirakın mənası yoxdur”.


Qeyd edək ki, Ümumdünya Antidopinq Agentliyi rusiyalı idmançıların 4 il ərzində ölkənin bayrağı altında dünya çempionatları, Olimpiya və Paralimpiya Oyunlarına qatılmasına qadağa qoyub.

Xəbər lenti