Mikael Qaros: “Qarabağ”la matçda itiriləsi heç nəyimiz yoxdur”

"Son turda "Viktoriya” üzərində 7:0 hesablı yerinə düşdü. Biz çox çətin dövrdəyik. Buna görə də yeddi qollu qələbə çox faydalı oldu”.

Bunu Lüksemburqun "Düdelanj” klubunun futbolçusu Mikael Qaros deyib.

Fransalı yarımmüdafiəçi Avropa Liqasının "Qarabağ”la bu gün keçiriləcək matçı ərəfəsində fikirlərini açıqlayıb: "Amma "Qarabağ”la qarşılaşma tam başqa olacaq. Komandamız üçün son turdakı 7 qol vacib idi. Həmin qələbənin "Qarabağ”la oyuna bağlılığı yoxdur. Sadəcə bu nəticə komandada yüksək əhval-ruhiyyə yaradıb. Son matçlarda göstərdiyimiz məhsuldarlıq bizə arxayınlaşmağa əsas vermir. Onlar tarixdə qaldı. İndi digər qarşılaşmaları düşünməliyik. Matçlara tam köklənmək, məşqdə səylə çalışmaq lazımdır”.

M.Qaros "Qarabağ” haqda məlumatının azlığını qeyd edib: "Rəqib barədə bilgim məhduddur. "Qarabağ”la oyunda ehtiyatlı olmalı, arxayınlaşmamalıyıq. Bu, Avropa Liqasının qrup mərhələsidir. "Qarabağ” da çox güclü rəqibdir. Amma bizim itiriləsi heç nəyimiz yoxdur. Rəqiblərə yuxarıdan aşağı da baxmırıq. Balanslaşmış komandamız da var”.

Müdafiəçi Avropa Liqasının komanda üçün ikinci dərəcəli olduğunu vurğulayıb: "Bizim üçün ölkə çempionatı daha prioritetdir. Təbii ki, Avropa Liqası da çox yaxşıdır. Amma unutmayaq ki, qrup mərhələsində olmağımız çempionatdakı uğur sayəsində mümkün olub. Əgər mövsümün sonunda ilk üç və ya dörd yerdən birini tutmasaq, Avropa Liqasında yaşadığımız bu hissləri gələn il görməyəcəyik. Hər qələbə sevinc bəxş edir. Bilmək olmaz, bəlkə "Qarabağ”la görüşdə də yenə bu sevinci yaşayacağıq”.

Qeyd edək ki, Lüksemburqda "Josi Bartel” stadionunda keçiriləcək görüş Bakı vaxtı ilə saat 23:00-da start götürəcək. (APA)