Xəzər Xəbər

Bakıda Formula 2 üzrə birinci yarışa start verilib

İdman | 12:12 • 28 Aprel 2018
Bakıda Formula 2 üzrə birinci yarışa start verilib

Aprelin 28-də saat 12-də Bakıda Formula 2 üzrə birinci yarışa start verilib.


Xezerxeber.az xəbər verir ki, Formula 2 yarışlarında hər biri iki pilotla təmsil olunan on komanda birincilik uğrunda mübarizə aparır. Birinci yarışda pilotlar Bakı şəhər halqasında 29 dövrə vuracaqlar.


Formula 1 Azərbaycan Qran-Prisi çərçivəsində keçirilən yarışda əvvəlcə pilotlar sərbəst yürüşlərdə güclərini sınayıblar. Gərgin idman mübarizəsi şəraitində keçən ilk yürüşdə "Carlin” komandasının braziliyalı pilotu Serjiu Sette Kamara bütün rəqiblərini qabaqlayıb. O, 1 dəqiqə 54,136 saniyə göstərici ilə birinci yeri tutub. İkinci ən yaxşı nəticə "Campos Vexatec Racing”in italiyalı pilotu Luka Qyottoya, üçüncü nəticə isə "MP Motorsport”un pilotu Ralf Boşunqa məxsusdur.


Sıralanma turunda isə "Dams” komandasının 22 yaşlı pilotu Aleksander Olbon 1 dəqiqə 54,48 saniyəlik nəticə ilə rəqibləri üçün əlçatmaz olub. "Carlin” komandasının sürücüsü Lando Norris ikinci, "Art Grand Prix”in pilotu Corc Rassel isə üçüncü yeri tutublar.


Aprelin 29-da 21 dövrədən ibarət ikinci yarış təşkil olunacaq.

Xəbər lenti