Fərid Qayıbovun Avropa Gimnastika İttifaqının prezidenti seçilməsi Azərbaycanın yüksək təşkilatçılıq qabiliyyətinə verilən qiymətdir.
Bu fikir Azərbaycan Gimnastika Federasiyasının baş katibi Fərid Qayıbovun Avropa Gimnastika İttifaqının (UGI) prezidenti seçilməsi münasibətilə dekabrın 6-da təşkil olunan mətbuat konfransında səsləndirilib.
Tədbirdə Azərbaycan Gimnastika Federasiyasının vitse-prezidenti Altay Həsənov, Milli Olimpiya Komitəsinin vitse-prezidenti Çingiz Hüseynzadə və Avropa Gimnastika İttifaqının prezidenti Fərid Qayıbov iştirak ediblər.
Yeni vəzifəyə seçilməsi ilə əlaqədar 2006-cı ildən tutduğu AGF-in baş katibi vəzifəsindən ayrılmağa qərar verdiyini vurğulayan F.Qayıbov bildirib: "Baş katiblikdən azad olunmağımla bağlı federasiya rəhbərliyinə müraciət etmişəm. Bu ay İcraiyyə Komitəsinin iclası keçiriləcək. Müraciətimə orada baxılacaq”.
AGF-in vitse-prezidenti Altay Həsənov qeyd edib ki, baş katib vəzifəsinə iki namizəd var: "Hələlik adlarını açıqlamağa tələsməyək. Fərid Qayıbov elə sistem yaradıb ki, özü bu vəzifəni tərk etsə də, iş davam edəcək. Sistemi kiminlə davam etdirməklə bağlı götür-qoy etməliyik”.
Çingiz Hüseynzadə ölkəmizdə gimnastikanın inkişafında Azərbaycan Respublikasının Birinci vitse-prezidenti, Federasiyanın prezidenti xanım Mehriban Əliyevanın yüksək təşkilatçılıq qabiliyyətinin mühüm rol oynadığını vurğulayıb. Bildirib ki, Mehriban Əliyeva ölkəmizdə idmanın inkişafına daim xüsusi diqqət yetirir. Mehriban xanım 2002-ci ildə Azərbaycan Gimnastika Federasiyasının prezidenti seçildikdən sonra gimnastika ölkəmizdə sürətlə inkişaf etməyə başladı. Həmin vaxtdan etibarən Azərbaycan idmanın bu növü üzrə nüfuzlu beynəlxalq yarışlara ev sahibliyi edib və etməkdədir. (AZƏRTAC)