Bərdədə yaralanan şəxslərin durumu necədir?

Ermənistan silahlı qüvvələri tərəfindən Bərdə rayonu ərazisinə raket atılması nəticəsində yaralanan şəxslərin xəstəxanada müalicəsi davam edir.

Bu barədə "Report"un cəbhə bölgəsinə ezam olunmuş əməkdaşı xəbər verir.

Xəstəxanaya daxil olan yaralıların hamısına tibbi yardım göstərilib.

Xəstəxananın direktoru "Report"un əməkdaşına bildirib ki, hazırda əməliyyatda olan xəstələr də var:

"Ağır xəstələrimiz reanimasiyada müalicə almaqda davam etdirilir. Digər xəstələr də hazırda palataya yerləşdirilib və müalicələri xəstəxanada davam etdiriləcək".

Qeyd edək ki, oktyabrın 28-i saat 13 radələrində düşmənin silahlı birləşmələri tərəfindən Bərdə şəhərinin dinc sakinlərin sıx hərəkətdə olduğu və ticarət obyektlərinin yerləşdiyi ərazisinə beynəlxalq hüquqla qadağan olunmuş kaset bombalarından istifadə edilməklə zərbələrin endirilməsi nəticəsində 21 nəfər həlak olub, 70-ə yaxın şəxs isə yaralanıb. Şəhərdə yerləşən mülki infrastruktur obyektlərinə və nəqliyyat vasitələrinə külli miqdarda ziyan dəyib.