Xəzər Xəbər

Səhiyyə naziri uşaqlarla bağlı əmr imzaladı

Gündəm | 11:07 • 18 Oktyabr 2018
Səhiyyə naziri uşaqlarla bağlı əmr imzaladı
Səhiyyə naziri Oqtay Şirəliyev "Uşaqların icbari dispanserizasiyası işinin gücləndirilməsi barədə” əmr imzalayıb.


XəzərXəbər xəbər verir ki, əmrdə qeyd olunub ki, "Uşaqların icbari dispanserizasiyadan keçirilməsinə dair Dövlət Proqramı” çərçivəsində uşaqlara tibbi yardım göstərən tibb müəssisələrinin maddi-texniki bazasının yaxşılaşdırılması, onların müasir tibbi texnika və avadanlıqlarla təchiz edilməsi və bu istiqamətdə həyata keçirilən tədbirlər uşaqlar arasında xəstələnmənin, sağlamlıq imkanları məhdudluğun və ölümün səviyyəsinin azaldılmasına imkan verib.

Bununla belə, "Uşaqların icbari dispanserizasiyadan keçirilməsinə dair 2013-2017-ci illər üçün Dövlət Proqramı”nın icra vəziyyətinə dair hazırlanan arayışda bu sahədə müəyyən nöqsan və çatışmazlıqların olduğu vurğulanıb.

Bu səbəbdən "Uşaqların icbari dispanserizasiyadan keçirilməsinə dair 2018-2022-ci illər üçün Dövlət Proqramı”nın icrasını təmin etmək üçün Səhiyyə Nazirliyinin tədbirlər planı təsdiq edilib.

Tədbirlər planında adları qeyd olunan icraçı qurumların rəhbərlərinə tapşırılıb ki, müəyyən olunan müddətdə tapşırıqların həyata keçirilməsini təmin etsinlər və görülən işlər barədə hər yarımilliyinin sonunda Səhiyyə Nazirliyinin Tibbi yardımın təşkili şöbəsinə hesabat təqdim etsinlər.

Əmrin icrasına nəzarət nazir müavinlərinə tapşılırıb.

Xəbər lenti