Azərbaycan Xarici İşlər Nazirliyi Ermənistanın işğal
edilmiş ərazilərimizdə hərbi təlimlər keçirməsinə münasibət
bildirib.
XİN-in mətbuat xidmətindən XəzərXəbər-ə daxil olan
bəyanatda deyilir: "Kütləvi informasiya vasitələrinin verdiyi
məlumata əsasən, bu ilin 25-28 sentyabr tarixlərində Azərbaycan
Respublikasının Ermənistan tərəfindən işğal olunmuş ərazilərində
hərbi aviasiyanın iştirakı ilə hərbi təlimlər keçiriləcək.
Ermənistan silahlı qüvvələrinin Azərbaycanın işğal olunmuş
ərazilərində növbəti təxribatçı addımı vəziyyətin daha da
gərginləşməsinə və ağır fəsadlara yol aça bilər. Azərbaycan və
Ermənistan xarici işlər nazirlərinin ATƏT-in Minsk Qrupunun
həmsədrlərinin vasitəçiliyi ilə cari ilin 26 sentyabr tarixində
Nyu-Yorkda planlaşdırılan görüşü ərəfəsində Ermənistanın atdığı bu
addım həmsədrlərin fəaliyyətinə və ümumiyyətlə münaqişənin həlli
üzrə danışıqlar prosesinə xələl gətirmək məqsədini güdür. Bir daha
xatırladırıq ki, cəbhə bölgəsində vəziyyətin gərginləşməsinə görə
bütün məsuliyyət tam şəkildə Ermənistan rəhbərliyinin üzərinə
düşür”.