Azərbaycan prezidenti
İlham Əliyev Braziliya Federativ Respublikasının xarici əlaqələr naziri
Aloyzio Nunyes Ferreiranın başçılıq etdiyi nümayəndə heyətini qəbul
edib.
XəzərXəbər-in
məlumatına görə, dövlət başçısı Braziliyanın xarici əlaqələr naziri
Aloyzio Nunyes Ferreiranın başçılıq etdiyi nümayəndə heyətinin ölkəmizə
səfərinin ikitərəfli münasibətlərimizin inkişafı baxımından önəmini qeyd
edib.
Əməkdaşlığımızın genişləndirilməsi istiqamətində bundan sonra da addımlar atmağın zəruriliyini qeyd edən prezident İlham Əliyev
ölkələrimiz arasında siyasi əlaqələrin yaxşı səviyyədə olduğunu deyib
və Braziliyanın xarici əlaqələr nazirinin Azərbaycana rəsmi səfərini
bunun yaxşı göstəricisi kimi dəyərləndirib. Gələcək illərdə qarşılıqlı
iqtisadi əməkdaşlığa diqqət yetirilməsinin vacibliyini vurğulayan dövlət
başçısı ölkələrimiz arasında ticarət dövriyyəsinin hələ ki, aşağı
səviyyədə olduğunu bildirib. İnvestisiya layihələrinə toxunan prezident İlham Əliyev biznes dairələrinin birgə fəaliyyəti sayəsində daha da yaxşı nəticələrə nail olmağın mümkünlüyün vurğulayıb.
Dövlət
başçısı Azərbaycan-Braziliya əlaqələrinin bundan sonra da uğurla
inkişaf edəcəyinə və nazir Aloyzio Nunyes Ferreiranın ölkəmizə səfərinin
yaxşı nəticələr verəcəyinə əminliyini ifadə edib.
Braziliyanın xarici əlaqələr naziri Aloyzio Nunyes Ferreira öz növbəsində prezident İlham Əliyevin
əməkdaşlığımızın inkişaf etdirilməsi ilə bağlı dediyi fikirlərlə tam
razı olduğunu bildirib. Nazir əlaqələrimizin genişləndirilməsində
qarşılıqlı səfərlərin önəmini vurğulayıb. Braziliyalı nazir ölkəsinin
Azərbaycan ilə əlaqələrin müxtəlif istiqamətlərdə inkişaf etdirilməsində
çox maraqlı olduğunu deyib və bildirib ki, ölkəmizə səfərinin əsas
məqsədi bununla bağlı məsələləri müzakirə etməkdir.
Görüşdə
Azərbaycan ilə Braziliya arasında iqtisadi, sərmayə qoyuluşu, biznes,
turizm, təhsil, mədəni, humanitar və digər sahələrdə əməkdaşlıqla bağlı
məsələlər ətrafında fikir mübadiləsi aparılıb.