Tanınmış şair Kəmalə Ağayeva vəfat edib

19.07.2019 12:05

Tanınmış şair, Əməkdar incəsənət xadimi, Prezident təqaüdçüsü Kəmalə Ağayeva vəfat edib.

AZƏRTAC xəbər verir ki, cəsarət və kövrəklik, həssaslıq və mülayimlik, təmkinlilik və coşqunluq onun yaradıcılığında qəribə bir vəhdət təşkil edir. Kəmalə xanımın şeirlərini oxuyanda qeyri-ixtiyari onun müəllifinin məhz xanım olduğu açıq-aşkar duyulur. Çünki bu şeirlərin ahəngində elə bir zəriflik, həssaslıq, həzinlik var ki, istər-istəməz bu ipək ovqatlı misraların ürək döyüntüsündə məhz qadın məhəbbətinin, həsrətinin döyüntüləri hiss edilir.

Qeyd edək ki, Kəmalə Ağayeva hansı mövzuya müraciət edibsə öz nəfəsi, öz duyğusu, öz deyim tərzi ilə fərqlənib. O, həmişə düşündüyünü deyib, vicdanının hökmünə sadiq olub, ötəri-keçəri vəziyyətlərə uyğunlaşmağa çalışmayıb. Həqiqi yaradıcılıq sevinci, iztirab və axtarışlarla dolu ömür yolu, xalqa və sənətə olan böyük sədaqəti onun həyat amalına çevrilib. Məhz bu xüsusiyyətlər onu xalqa sevdirib, ona şöhrət qazandırıb.

Kəmalə Ağayeva 1936-cı il iyulun 10-da Azərbaycanın Naxçıvan şəhərində anadan olub. 1953-1957-ci illərdə Azərbaycan Dillər Universitetinin fransız dili fakültəsində təhsil alıb.

1957-1961-ci illərdə Naxçıvanın Şıxmahmud kənd orta məktəbində, Naxçıvan şəhərindəki 1 nömrəli orta məktəbdə, 1961-1986-cı illərdə Naxçıvan şəhər internat məktəbində fransız dili müəllimi, 2002-2005-ci illərdə C.Məmmədquluzadə adına Naxçıvan Dövlət Musiqili Dram Teatrında ədəbi hissə müdiri, həm də həmin illərdə "Ümid çırağı” jurnalının baş redaktoru olub.

İlk mətbu şeiri – "Hilal olaydım” 1957-ci ildə "Azərbaycan” jurnalında dərc ediləndən sonra fəal bədii yaradıcılıqla məşğul olub. Fransız dilindən poetik tərcümələr edib. Onun "Məhsəti”, "İsmət”, "O, bizim dağların oğludur”, "Mənim tanrım gözəllikdir, sevgidir”, "Apardı sellər Saranı, "Göyçək Fatma”, "Tıq- tıq xanım”, "Məlikməhəmməd” və "Sirli sözlər” pyesləri tamaşaya qoyulub, efirdə səsləndirilib. Əsərləri keçmiş SSRİ və xarici ölkə xalqlarının dillərinə tərcümə olunub.

Kəmalə Ağayeva Fransa şairlərindən P.Elüar, P.Verleni, L.Araqon və digərlərinin əsərlərini tərcümə edib. Ümumittifaq ədəbiyyat tədbirlərində iştirak edib: 1980-ci ildə Özbəkistanda Azərbaycan incəsənəti günlərində, 1982-ci ildə Vaqif poeziya günlərində, 1967-ci ildə Ümumittifaq yazıçılar qurultayında nümayəndə olub.

1979-cu ildə sovet nümayəndə heyətinin tərkibində 20 gün ABŞ-ın Vaşinqton, Nyu-York, Çikaqo, San-Fransisko, Boston və Sietl şəhərlərində olaraq müxtəlif tədbirlərdə Azərbaycan şairəsi olaraq özünün vətənə, dostluğa, sülhə aid şeirlər ilə çıxışlar edib.

1965-1983-cü illərdə Azərbaycan KP Naxçıvan Vilayət Partiya Komitəsinin, 1981-1983-cü illərdə Azərbaycan Yazıçılar Birliyinin təftiş komissiyasının və Kitabsevərlər cəmiyyəti idarə heyətinin üzvü, dəfələrlə Naxçıvan şəhər Sovetinin deputatı olub.

Fransada Azərbaycan günlərində (1984), Türkiyədə Yunis Əmrə günlərində (1989-1990) iştirak edib.

O, 2019-cu ilin iyulun 18-də vəfat edib.

Allah rəhmət eləsin!

© xezerxeber.az


451 dəfə oxunub

XƏBƏRLƏR

ÇOX OXUNANLAR