Xəzər Xəbər

Yol polisi reyd keçirib: 13 sərxoş sürücü aşkarlanıb - FOTO

Hadisə | 13:41 • 4 Sentyabr 2018
Yol polisi reyd keçirib: 13 sərxoş sürücü aşkarlanıb -

Bakı Şəhər Dövlət Yol Polisi İdarəsinin əməkdaşları tərəfindən yol hərəkəti təhlükəsizliyini daha da səmərəli təşkil etmək və gecə saatlarında kobud qayda pozuntuları törədən sürücülərin aşkarlanması istiqamətində görülən tədbirlər davam etdirilir.


Daxili İşlər Nazirliyinin mətbuat xidmətindən xezerxeber.az-a bildiriblər ki, sonuncu belə reyd zamanı avtonəqliyyat vasitələrini sərxoş vəziyyətdə idarə edən 13 sürücü aşkarlanıb. Həmin sürücülərdən ikisi qadın olub. Aşkarlanan sürücülər alkoqol müayinəsindən keçirilmələri üçün tibbi məntəqəsinə aparılıb. Sərxoş sürücülərdən biri yol polisinin saxla əmrinə tabe olmayaraq hərəkətini davam etdirməyə çalışıb. Həmin şəxs Nobel prospektində yüksək sürətlə hərəkət edən nəqliyyat vasitəsini dayandırmaqdan imtina etsə də, Yol Patrul Xidməti əməkdaşlarının sayıqlığı nəticəsində "Nargilə” kafesinin yaxınlığında süni sıxlıq yaradılaraq saxlanılıb.


Bundan başqa, reyd zamanı nəqliyyat vasitəsini müvafiq sənədləri, sürücülük hüququ olmadan idarə edən, təhlükəsizlik kəmərindən istifadə etməyən, avtomobildə konstruksiya dəyişikliyi edən sürücülər də aşkarlanıb. Onlar barəsində müvafiq tədbirlər görülüb. Reyd zamanı, həmçinin avtoxuliqanlıq edən sürücülərə də rast gəlinib. Həmin sürücülər yol polisinin topladığı sənədlər əsasında məhkəməyə təqdim olunub və barələrində inzibati qərar çıxarılıb.


Reyd zamanı ümumilikdə 30-dan çox sürücü barəsində inzibati qaydada protokol tərtib olunub, 15 sürücüyə isə xəbərdarlıq olunub.


Bakı Şəhər Baş Polis İdarəsi Dövlət Yol Polis İdarəsi əməkdaşları tərəfindən belə maarifləndirici tədbirlər bundan sonra da davam etdiriləcək.

Xəbər lenti