Məhkəmə “falçı Səkinə” ilə bağlı QƏRAR VERDİ: iş adamının arvadını...

İş adamı Barat Abdullayevin keçmiş həyat yoldaşı Təyminə Abdullayevaya qarşı dələduzluqda təqsirləndirilən və "Falçı Səkinə” kimi tanınan Səkinə İsmayılovanın cinayət işi üzrə məhkəmə prosesi keçirilib.

Bakı Ağır Cinayətlər Məhkəməsində hakim Zeynal Ağayevin sədrliyi ilə baş tutan prosesdə hökm oxunub.

Məhkəmənin hökmü ilə Səkinə İsmayılovaya bəraət verilib və o, məhkəmə zalından azadlığa buraxılıb.

Qeyd edək ki, prokuror Səkinə İsmayılovanın 6 il müddətinə azadlıqdan məhrum edilməsini istəyib.

Təyminə Abdullayevaya əri Barat Abdullayevin şikayəti əsasında cinayət işi açılıb.

Barat Abdullayev şikayətində bildirib ki, arvadı birgə nikahdan olan yaşayış sahəsini satıb pulunu ələ keçirmək istəyib. Bu məqsədlə yeni şəxsiyyət vəsiqəsini saxtalaşdırıb. Yeni şəxsiyyət vəsiqəsində ailəli yox, subay olduğunu yazdırıb. Həmin sənəddən istifadə edərək qeyd edilən mənzili 250 min manata özgəninkiləşdirək, ona 890 min manat məbləğində ziyan vurub.

Barat Abdullayev şəxsi bizneslə məşğuldur. Onun Bakıda hotelinin, ticarət obyektlərinin olduğu bildirilir. Barat Abdullayev həyat yoldaşından boşanmaq üçün məhkəməyə müraciət edib.

Təyminə Abdullayeva ərinin dedikəri ilə razılaşmayaraq söyləyib ki, pullarını Səkinə İsmayılova adlı falçı ələ keçirib. Səkinə İsmayılova ondan fala baxmaq adı ilə əvvəlcə 20 min, sonra isə 10 min manat alıb.

Daha sonra onun evini banka girov qoyaraq pul götürüblər.

Təyminə Abdullayeva iddia edir ki, falçı Səkinə onun pullarını və əmlakını ələ keçirib.

Daha sonra Səkinə İsmayılova da həbs edilib.

Xatırladaq ki, ərinə qarşı dələduzluq etməkdə təqsirli bilinərək həbs edilən Təyminə Abdullayeva Bakı Ağır Cinayətlər Məhkəməsinin hökmü ilə 8 il müddətinə azadlıqdan məhrum edilib.

Bakı Apelyasiya Məhkəməsində isə onun cəzası 5 ilə endirilməsi barədə qərar qəbul edib./publika.az