İyunun 5-i axşam saatlarında Rusiya-Azərbaycan sərhədində güclü zəlzələ baş verib.
"Report” yeraltı təkanların həmçinin hiss olunduğu Gürcüstanın Milli Seysmologiya Mərkəzinə istinadən xəbər verir ki, zəlzələnin maqnitudası 5,7 bal təşkil edib.
Bildirilir ki, təbii fəlakət Bakı vaxtı ilə 22:40-da olub. Onun ocağı yerin 16 km dərinliyində qeydə alınıb. Zəlzələnin episentri Azərbaycanın Zaqatala şəhərindən 20 km, Gürcüstanın paytaxtı Tbilisidən isə 169 km aralıda olub.
Yeraltı təkanlar Azərbaycan, Ermənistan, Gürcüstan və Rusiyanın cənubunda hiss olunub.
***
AMEA-nın Respublika Seysmologiya Mərkəzi Azərbaycanda baş vermiş zəlzələ ilə bağlı rəsmi məlumat yayıb.
XəzərXəbər mərkəzin saytına istinadən xəbər verir ki, zəlzələ, ilkin məlumatlara əsasən, yerli vaxtla saat 22:40-da Zaqatala ərazisində qeydə alınıb.
Yeraltı təkanlar yerin 2 km dərinliyində 5,5 maqnituda gücündə olub.
Zəlzələ episentirdə 6 bala qədər hiss olunub.
