“Boeing 777”-in sərnişinləri Bakıdan Londona yola salındı

Bakıya məcburi qəza enişi edən "British Airways” şirkətinin "Boeing 777” təyyarəsinin sərnişinləri Bakıdan başqa təyyarə ilə Londona yola salınıb.

XəzərXəbər xəbər verir ki, bu barədə "Azərbaycan Hava Yolları” QSC-nin (AZAL) mətbuat xidmətinin rəhbəri Paşa Kəsəmənski deyib. AZAL rəsmisi bildirib ki, aviaşirkətin qərarına əsasən sərnişinləri aparmaq üçün Bakıya başqa təyyarə göndərilib.

"Bakıya qəza enişi edən və təmir edilən "Boeing 777”-in ekipaj üzvləri dincəldikdən sonra həmin təyyarə də Londona uçacaq”.

Qeyd edək ki, dekabrın 11-də Mumbai-London istiqamətində uçan təyyarədə tüstülənmə yarandığına görə hava gəmisinin kapitanı Bakıda məcburi eniş etmək barədə qərar qəbul edib. Təyyarənin içərisində 135 sərnişin və 17 heyət üzvü olub.