Xəzər Xəbər

Sabiq icra başçısının həbsdə olan qızı azadlığa çıxmaq istəyir

Hadisə | 17:51 • 28 Noyabr 2017
Sabiq icra başçısının həbsdə olan qızı azadlığa çıxmaq istəyir

Salyan rayonunun keçmiş icra başçısı Seyran Seyranovun dələduzluqda təqsirləndirilən qızı Nigar Abdullayeva barəsindəki hökmdən kassasiya şikayəti verib.

Lent.az-ın məlumatına görə, şikayətin baxılacağı tarix məlum olub. Ali Məhkəmədə keçiriləcək iclas noyabrın 29-na təyin edilib. İşə hakim Tahir Kazımovun sədrliyi ilə baxılacaq.

Qeyd edək ki, Salyan rayonunun keçmiş icra başçısı Seyran Seyranovun qızı olan 1982-ci il təvəllüdlü N.Abdullayeva 2014-cü ilin sentyabr ayına kimi İqtisadi İnkişaf Nazirliyinin protokol şöbəsinin rəisi olub.

O, 500 min manat pulu dələduzluq yolu ilə ələ keçirməkdə təqsirləndirilib. N.Abdullayeva turizm agentliyi qurmaq adı ilə 19 nəfərdən külli miqdarda pul alıb və qaytarmayıb. O, Cinayət Məcəlləsinin 178.3.2-ci (dələduzluq, külli miqdarda ziyan vurmaqla törədildikdə) maddəsi ilə ittiham olunub.

Bakı Ağır Cinayətlər Məhkəməsinin hökmü ilə N.Abdullayeva 8 il müddətinə azadlıqdan məhrum edilib. Hökmdən narazı qalan məhkum apellyasiya şikayəti verib. N.Abdullayevanın apellyasiya şikayəti təmin edilməyib.

Xəbər lenti