Tərtər şəhərindəki
Gənclər Mərkəzində pambıq yığımına hazırlıqla bağlı qarşıda duran
vəzifələrə həsr olunmuş müşavirə keçirilib.
Kənd Təsərrüfatı Nazirliyindən XəzərXəbər-ə verilən xəbərə görə, tədbirdə Prezident İlham Əliyevin iştirakı ilə 2018-ci il martın 26-da Bərdədə
keçirilən "Pambıqçılığın inkişafı məsələlərinə dair respublika
müşavirəsi”ndə verilən tapşırıqların icra vəziyyəti müzakirə edilib. Kənd Təsərrüfatı Nazirliyinin
mütəxəssislərinin, rayonun aidiyyəti idarə və təşkilatlarının
nümayəndələrinin, pambıqçılıqla məşğul olan fermerlərin, torpaq
mülkiyyətçilərinin, mexanizatorların, kənd inzibati ərazi nümayəndələri
və bələdiyyə sədrlərinin iştirak etdiyi tədbirdə Tərtər
Rayon İcra Hakimiyyətinin başçısı Müstəqim Məmmədov çıxış edərək,
pambıqçılığın inkişafı istiqamətində rayonda görülən işlər, mövcud
vəziyyət barədə məlumat verib. Bildirib ki, bu il rayon ərazisində 3300
hektarda çiyid səpini həyata keçirilib. Sahələrə göstərilən düzgün
aqrotexniki tədbirlər nəticəsində yaxşı bitiş alınıb. Tarlalarda
kultivasiya, seyrəltmə, gübrələmə, suvarma işləri, sofkaya, mənənəyə və
digər zərərvericilərə qarşı dərmanlama tədbirləri vaxtlı-vaxtında həyata
keçirilib. Hazırda pambıq tarlalarında defolyasiya işləri aparılır,
məhsul yığımına hazırlıq görülür. Texnikalar hazır vəziyyətə gətirilir,
digər zəruri aqrotexniki və təşkilati tədbirlər həyata keçirilir.
Tarlaların vəziyyəti bu il də məhsulun bol olacağından xəbər verir.
Kənd
təsərrüfatı nazirinin müavini Seyfəddin Talıbov "Azərbaycanda
pambıqçılığın inkişafı - hədəflər və prespektivlər” mövzusunda çıxış
edərək, nazirlik tərəfindən bu sahədə görülmüş işləri və qarşıda duran
hədəfləri diqqətə çatdırıb. Azərbaycanda pambıqçılığın zəngin tarixi
ənənəyə və böyük potensiala malik olduğunu xatırladan nazir müavini
pambıqçılığın inkişaf etdirilməsi ilə bağlı Prezident
tərəfindən verilən tapşırıq və tövsiyələrin ölkəmizdə bu sahənin
sürətli inkişafı üçün əlverişli şərait yaratdığını deyib. 2016-cı ildən
başlayaraq Azərbaycanda pambıqçılığın inkişafı istiqamətində görülən
kompleks tədbirlərə toxunan Seyfəddin Talıbov pambıqçılıq sahəsində
istifadə olunmuş məhsula görə subsidiya siyasətinin tətbiqindən danışıb,
dövlətin dəstəyi ilə fermerlərin gübrə, maşın və texnika ilə təminatı
sahəsində irimiqyaslı tədbirlərin görüldüyünü bildirib.
Diqqətə çatdırılıb ki, Prezident İlham Əliyev Bərdədə
keçirilən müşavirədə məhsuldarlığın yüksəldilməsini mühüm vəzifə kimi
qarşıya qoyub. Bu gün qarşıda duran əsas hədəf pambığın becərilməsində
intensiv texnologiyalardan istifadə etməklə məhsuldarlığı artırmaq və
500 min ton məhsul istehsalına nail olmaqdır. Bunun üçün torpaq və sudan
səmərəli istifadə edilməli, pambıq yararlı və su təminatı olan
ərazilərdə becərilməli, növbəli əkin tətbiq edilməlidir.
Pambıqçılığın inkişafında əsas şərtlərdən birinin sertifikatlı, keyfiyyətli toxumla təminat olduğunu deyən nazir müavini Prezidentin tapşırığı ilə Kənd Təsərrüfatı Nazirliyi tərəfindən Ucar rayonunda pambıq, toxum və pambıq yağı emalı zavodlarının inşa edildiyini diqqətə çatdırıb.
Müşavirədə
nazirliyin Bitkiçiliyin təşkili və monitorinqi şöbəsinin müdiri Rəfail
Quliyev "Pambıqçılığın intensiv texnologiyalar əsasında becərilməsi”,
Respublika Bitki Mühafizə Mərkəzinin rəisi Damət Sultanov "Bitki
mühafizə vasitələrindən səmərəli istifadənin təşkili”, "Aqrolizinq”
ASC-nin şöbə müdiri İsrafil İsmayılov "Texnika və gübrə ilə təminatın
vəziyyəti”, Bitki Mühafizə və Texniki Bitkilər Elmi-Tədqiqat
İnstitutunun direktor əvəzi Azad İbrahimov "Pambığın yüksək aqrotexniki
şəraitdə becərilməsi” mövzularında çıxışlar ediblər.
Pambıq
yığımı mövsümünün başlanması ilə əlaqədar görüləcək işlər, məhsulun
vaxtında və itkisiz yığılması üçün qarşıda duran vəzifələr müzakirə
olunub. Qarşılıqlı fikir mübadiləsi aparılıb, fermerləri maraqlandıran
suallar cavablandırılıb.
Müşavirə başa çatdıqdan sonra tədbir iştirakçıları pambıq tarlalarına baxış keçiriblər.