XəzərXəbər-in məlumatına görə, bu sözləri prezident İlham Əliyev hüquq-mühafizə orqanları rəhbərlərinin iştirakı ilə keçirilən iclasda deyib. Ölkə başçısının sözlərinə görə, terror aktları nəticəsində iki polis əməkdaşı şəhid olub, Gəncə şəhər İcra Hakimiyyətinin başçısı isə yaralanıb:
"Allah şəhidlərimizə rəhmət etsin, yaralananlarımıza şəfa versin .Bu cinayəti törədən terrorçu qruplaşma Azərbaycanda sabitliyi pozmaq istəyib. Bunun əsas məqsədi bundan ibarətdir. Cəmiyyətimizi qorxutmaq məqsədi ilə bu qanlı terror aktları törədilib. Terror aktları dini şüarlar altında törədilib. Bu, özlüyündə islam dininə qarşı ən böyük cinayətdir. İslam sülh, mərhəmət dinidir. Azərbaycan islam mədəniyyətini dünyada ən çox təbliğ edən ölkələrdən biridir. Keçən il Azərbaycanda islam həmrəyliyi ili elan edilib”.
Prezident
qeyd edib ki, Azərbaycanda dövlət vəsaiti hesabına tarixi, dini
abidələr tam bərpa olunub: "Bu cinayəti dinimizə bağlamaq ən böyük
cinayətdir. Cinayətkarlar müsəlman deyillər və cinayətlər cavabsız
qalmır. Cinayətkarlar və onların arxasında dayananlar öz məkrli
niyyətlərinə çata bilməyəcəklər. Və bütün Azərbaycan xalqı bu qanlı
cinayəti birmənalı olaraq pislədi, bunu törədənlərə öz nifrətini ifadə
etdi. Azərbaycan dövləti isə öz üzərinə düşən vəzifələri şərəflə yerinə
yetirir. Cinayətkar dəstə zərərsizləşdirilib. Əməliyyat axtarış işləri
davam etdirilir, bu cinayətdə iştirakı olanların hamısı məsuliyyətə cəlb
olunacaq. Hüquq-mühafizə orqanları qarşısında bu vəzifə qoyulub”.