Azərbaycan brendi olan "ASAN xidmət”in yaradılmasından 6 il ötür.
Prezident İlham Əliyevin 2012-ci il 13 iyul tarixli 685 nömrəli fərmanına əsasən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində "ASAN Xidmət" mərkəzləri yaradılıb.
İlk
"ASAN xidmət” 2013-cü il yanvarın 15-də vətəndaşlara xidmət göstərməyə
başlayıb. Pilot layihə olduğu üçün 1 nömrəli "ASAN xidmət” mərkəzinin
xidmətlərindən ilkin mərhələdə paytaxtın Nəsimi, Nərimanov və Binəqədi
rayonlarının sakinləri yararlanıblar.
Qurumun yaradılmasında
məqsəd vətəndaşlara birbaşa xidmət göstərəcək "ASAN xidmət”
mərkəzlərinin vahid şəkildə idarə edilməsi idi. Buraya xidmət
mərkəzlərində fəaliyyət göstərən dövlət orqanlarının əməkdaşlarının
işinin əlaqələndirilməsi, nəzarət və qiymətləndirmənin aparılması,
dövlət orqanlarının informasiya bazalarının qarşılıqlı inteqrasiyası,
elektron xidmətlərin təşkili prosesinin sürətləndirilməsi və bu sahədə
idarəetmə sisteminin təkmilləşdirilməsi daxildir.
"ASAN xidmət”
mərkəzləri dövlət orqanları tərəfindən göstərilən xidmətlərin vahid və
əlaqələndirilmiş formada həyata keçirilməsini təmin edən qurumlardır.
Mərkəzlər dövlət qulluqçularının fəaliyyətində əhaliyə münasibətdə
vətəndaş məmnunluğunun təmin edilməsi istiqamətində yeni yanaşmanın
formalaşdırılmasına, ölkədə dövlət qulluqçusu-vətəndaş münasibətlərinin
keyfiyyətcə yeni müstəviyə keçməsinə xidmət edir.
Bu gün "ASAN
xidmət” mərkəzlərdə vətəndaşlara 10 dövlət orqanı ilə yanaşı, özəl
şirkət və müəssisələr tərəfindən ümumilikdə 250-dən çox müxtəlif
xidmətlər göstərilir. Regionlarda 10 səyyar "ASAN xidmət” avtobusu və
səyyar "ASAN qatar” vasitəsilə vətəndaşlara xidmətlərin göstərilməsi
davam etdirilir. 2013-cü ilin iyunundan etibarən təqribən 1 milyon 329
mindən çox vətəndaşa səyyar formada xidmət göstərilib. Bu günədək "ASAN
xidmət”-ə 22 milyondan çox vətəndaşın müraciəti qeydə alınıb.
Hazırda ölkədə 13 "ASAN xidmət” mərkəzi fəaliyyət göstərir. 2020-ci ildə "ASAN Xidmət” Azərbaycanı tam əhatə edəcək və hər bir Azərbaycan vətəndaşı "ASAN Xidmət”dən yararlana biləcək. 2020-ci ilə qədər "ASAN Xidmət” mərkəzlərinin sayı 20-yə çatdırılacaq. Bu ilin payızında Şəki və İmişlidəki regional mərkəzlər istifadəyə veriləcək. Mərkəzlərin hər biri 500 mindən çox əhaliyə xidmət göstərəcək. Prezident İlham Əliyevin tapşırığına uyğun olaraq, növbəti dövrdə daha 5 mərkəzin tikilməsi planlaşdırılıb. Bu istiqamətdə çox intensiv işlər gedir.
"ASAN
xidmət” vətəndaşlara dövlət və özəl xidmətləri vahid məkandan
göstərilməsini təmin edən nadir modeldir və e-hökumətin əhəmiyyətli
tərkib hissələrindən biridir. Mərkəzlərin fəaliyyəti operativlik,
şəffaflıq, nəzakətlilik, məsuliyyət və rahatlıq prinsipləri əsasında
qurulur. Xidmətlərin göstərilməsində innovativ metodlar vətəndaşlara
vaxtlarına və vəsaitlərinə qənaət etməyə imkan verir. Belə ki, vahid
mərkəzi ziyarət edən vətəndaşlar onlarla dövlət və özəl təşkilatlar
tərəfindən göstərilən müxtəlif xidmətlərdən istifadə edə bilərlər.
Xidmətlərin
göstərilməsinə görə rüsumlar banklar vasitəsilə ödənilir ki, bu da
"ASAN xidmət”in əsas prinsiplərindən olan şəffaflığın təminində önəmli
pay sahibidir. Mərkəzlərdə həyata keçirilən bütün əməliyyatlar və
tranzaksiyalar videomüşahidə kameralarının vasitəsilə qeydiyyata alınır.
Beləliklə, bürokratik maneələr və korrupsiya halları tam aradan
qaldırılır.
"ASAN xidmət” mərkəzlərində növbələrini gözləyən
vətəndaşların vaxtlarını rahat və mənalı keçirmələri üçün bütün şərait
yaradılıb. Mərkəzlərdə vətəndaşlar internet-kafe xidmətlərindən, ana və
uşaq otaqlarından, uşaq meydançasından, həmçinin özünəxidmət
məntəqələrindən istifadə edə bilərlər. "Vətəndaş həmişə haqlıdır”
şüarını rəhbər tutan "ASAN xidmət”də nəzakətlilik və etik davranış
qaydalarına ciddi əməl olunur. Mərkəzlərin əməkdaşları ixtisasartırma
üzrə müxtəlif təlimlərdən keçirlər, beləliklə daim etik davranış
səriştələrini artırmış olurlar. "ASAN xidmət”də yeni ideyalar və
innovativ metodların tətbiqi vətəndaşlara göstərilən xidmətlərin
keyfiyyətini artırmağa xidmət edir. Əlbəttə, bütün bunların nəticəsidir
ki, "ASAN xidmət” mərkəzlərinə edilən müraciətlər gündən-günə
artmaqdadır.
"ASAN xidmət” Birləşmiş Millətlər Təşkilatının
2015-ci il Dövlət Xidmətləri Mükafatına (United Nations Public Service
Award 2015) layiq görülüb. Eyni zamanda həmçinin "ASAN radio”, "ASAN
Təlim-Tədris mərkəzi” və ABAD
satış-sərgi mərkəzi fəaliyyət göstərir. Azərbaycana gələn əcnəbilər və
vətəndaşlığı olmayan şəxslər üçün viza verilməsi prosedurunun
sadələşdirilməsi, müasir informasiya texnologiyalarının tətbiqi ilə
operativliyi və şəffaflığı təmin edən elektron viza sisteminin
yaradılması məqsədilə Azərbaycan Respublikasının Prezidenti
2016-cı il iyunun 1-də "Elektron vizaların verilməsi prosedurunun
sadələşdirilməsi və "ASAN viza” sisteminin yaradılması haqqında” Fərman
imzalayıb. Azərbaycan Respublikasına gələn əcnəbilərə və vətəndaşlığı
olmayan şəxslərə elektron viza verilməsi üçün "ASAN viza” sistemi
2017-ci il yanvarın 10-dan fəaliyyətə başlayıb. Hazırda "ASAN viza”
portalı 7 dildə (Azərbaycan, ingilis, fransız, ispan, ərəb, fars və rus)
fəaliyyət göstərir. Dövlət başçısının fərmanı ilə yaradılan "ASAN viza”
sistemi qısa müddət ərzində ölkəmizə turist axınının artmasına şərait
yaradıb.
Daha bir yenilik isə "ASAN Ödəniş” sistemi üzərindən
viza verilməsi prosesidir. Əcnəbilərə və vətəndaşlığı olmayan şəxslərə
Azərbaycanın beynəlxalq hava
limanlarında viza müraciəti prosesinin təmin edilməsi üçün "ASAN
Ödəniş” terminallarından istifadə edilir Terminallara inteqrasiya
edilmiş "ASAN viza” sistemi vasitəsilə əcnəbilər elektron müraciət
formasını dolduraraq viza rüsumunu terminaldan ödəyə bilirlər. Əcnəbilər
və vətəndaşlığı olmayan şəxslər vizaya dair müraciətlərinin
nəticələrini də "ASAN Ödəniş” terminalından əldə edə bilirlər.
"ASAN
viza” sisteminin köməyilə xaricilər və vətəndaşlığı olmayan şəxslər üç
gün və ya üç saat ərzində elektron viza əldə edə bilir. Əvvəllər sayt
yalnız üç dildə – Azərbaycan, rus və ingilis dillərində fəaliyyət
göstərirdisə, hal-hazırda saytın fars, ərəb, fransız və ispan dilində
versiyaları əlavə olunub.
Yeni layihələrdən biri də "ASAN
Turist” mobil applikasiyasıdır. Bu layihə ölkəmizə gələn turistlərin
bütün turizm xidmətlərindən yararlanmasına imkan verəcək vahid
platformadır. Turistlər applikasiyadan istifadə etməklə öz maraq
dairəsinə uyğun obyektləri naviqatordan rahatlıqla taparaq xidmətlərdən
istifadə edə, turizm şirkətlərinin regionlara təşkil etdikləri turlardan
yararlana və özləri üçün səfərləri planlaşdıra bilərlər.
Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində olan "ABAD” (Ailə Biznesinə Asan Dəstək) publik hüquqi şəxs Prezident İlham Əliyevin 2016-cı il 23 sentyabr tarixli fərmanı ilə yaradılıb. "ABAD”
publik hüquqi şəxsin yaradılmasında məqsəd Azərbaycan Respublikasının
sosial-iqtisadi inkişafında vətəndaşların fəal iştirakına, kiçik və orta
sahibkarlığın inkişafına, əhalinin məşğulluq səviyyəsinin artırılmasına
və rəqabətqabiliyyətli ailə təsərrüfatlarının formalaşdırılmasına
dəstək vermək məqsədilə sosialyönümlü layihələrin həyata keçirilməsidir.
"ABAD”
publik hüquqi şəxsin fəaliyyətinin prioritet istiqamətləri
dekorativ-tətbiqi xalq sənətkarlığı və kənd təsərrüfatı sahəsində
fəaliyyət göstərən ailə bizneslərinə dəstək göstərməkdir. "ABAD” öz fəaliyyətini regional mərkəzlər vasitəsilə həyata keçirir. Satışları təşkil etmək məqsədilə "ABAD” Bakı şəhərinin müxtəlif yerlərində sərgi-satış mərkəzləri açıb - İçərişəhərdə, Heydər Əliyev Beynəlxalq Aeroportunda ("Duty free” zonası), Bakı Dəmir Yolu Vağzalında və Milli Gimnastika Arenasında. Belə bir sərgi-satış mərkəzi turizm prizmasından şox perspektivli olan Şamaxının Dəmirçi kəndində də fəaliyyət göstərir. Bu gün "ABAD”
leyblı altında buraxılan məhsulların (mürəbbələr, cemlər, kolbasa və
pendirlər) ölkənin ən iri hipermarketində satışı təşkil olunur.
Könüllülər
də "ASAN xidmət” fəaliyyətə başladığı ilk gündən etibarən bu
konsepsiyanın komponentidir. Bu prosesə 14 min könüllü gənc qoşulub. Bu
günə kimi könüllülər tərəfindən 1000 təlim, 300 layihə həyata keçirilib.
Habelə 850-dən çox könüllü "ASAN Kadr” portalı vasitəsilə işlə təmin
olunub. "ASAN Məktub” və "ASAN Kadr” layihələri qabaqcıl təcrübələr kimi
BMT-nin "Cənub-Cənub Əməkdaşlığı çərçivəsində Qabaqcıl Mexanizmlər və Həllər" portalına daxil edilib.
Təhsil Nazirliyinin və Azərbaycan Respublikasının Prezidenti
yanında Vətəndaşlara Xidmət və Sosial İnnovasiyalar üzrə Dövlət
Agentliyinin birgə layihəsi olan "ASAN Peşə" mərkəzi yaradılıb. Layihə
ixtisaslı kadrların hazırlanmasını və onların əmək bazarının dəyişən
tələblərinə uyğun rəqabət qabiliyyətinin artırılmasını təmin etmək
məqsədi daşıyır. "ASAN Peşə" mərkəzi bütün növ zəruri avadanlıq, təlim
və tədris vəsaitləri ilə təchiz olunub. Layihəyə uyğun olaraq, "ASAN
Peşə" mərkəzində 4 istiqamət üzrə - elektrik, mexanik, santexnik,
tikişçi peşələri üzrə ən müasir maddi-texniki baza vardır və burada
mütəxəssislərin iştirakı nəzərdə tutulub.
Həmçinin Bakıda 2 "ASAN Kommunal” mərkəzi fəaliyyətə göstərir. Bakı
şəhəri üzrə qeydiyyat məhdudiyyəti olmadan vətəndaşlar mərkəzin
xidmətlərindən istifadə edə bilirlər. "ASAN Kommunal” mərkəzində Azərişıq, Azərsu və Azəriqaz tərəfindən 45 növ xidmət göstərilir. Yaxın gələcəkdə Bakıda, Ukrayna dairəsi yaxınlığında 3 saylı "ASAN Kommunal" mərkəzinin açılması planlaşdırılır.
"ASAN
xidmət”in qazandığı uğurlar qısa müddət ərzində dünyanın müxtəlif
ölkələrində maraqla qarşılanıb. Azərbaycanın "ASAN xidmət” təcrübəsinin
öyrənilməsinə başlanılıb. 2016-ci il iyulun 12-də Əfqanıstan Prezidentinin
sarayında dövlət xidmətlərinin göstərilməsinin mütərəqqi mexanizminin
yaradılmasına dair Anlaşma Memorandumunun imzalanması mərasimi
keçirilib. Anlaşma Memorandumu Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Əfqanıstan Respublikasının Maliyyə Nazirliyi
arasında imzalanıb. Bu Memoranduma əsasən Azərbaycanın "ASAN xidmət”
modeli əsasında Əfqanıstanda dövlət xidmətlərinin göstərilməsi mexanizmi
olan "Asan Khedmat” təsis edilib,
"ASAN xidmət”in fəaliyyətini yüksək qiymətləndirən Əfqanıstan İslam Respublikasının Prezidenti
Məhəmməd Əşrəf Qani deyib: "Əfqanlar buraya gəldikdən sonra öz
ölkələrində dəyişiklik etmək inamı ilə qayıdırlar. Bunların əyani sübutu
"ASAN xidmət”dir. Maliyyə naziri səfər etdikdən sonra bu təcrübə dərhal
tətbiq olunmağa başladı. Müvafiq qurum yaradıldı”.
Bundan başqa,
İtaliya, Koreya, Fransa, İndoneziya, Monteneqro və ISESCO təşkilatı ilə
əməkdaşlığa dair Anlaşma memorandumları imzalanıb. Artıq dünyada
Azərbaycan brendi kimi tanınan "ASAN xidmət” modeli müxtəlif mükafatlar
qazanıb. "ASAN xidmət” 2015-ci ildə BMT-nin
"Dövlət xidmətlərinin göstərilməsinin təkmilləşdirilməsi”
kateqoriyasında birinci yerə layiq görülərək xüsusi mükafat və diplomla
təltif olunub.
Eyni zamanda, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və tabeliyində olan "ASAN xidmət” mərkəzləri Britaniya
Əməyin Mühafizəsi Şurası tərəfindən 13 sahə üzrə keçirilən və müxtəlif
dövlətlərdən olan 700-dən çox müəssisənin müraciət etdiyi müsabiqənin
"Dövlət xidmətlərinin həyata keçirilməsinin təşkilində təhlükəsiz əmək
şəraitinin qurulması” sahəsi üzrə qalibi olub.
Həmçinin 2014-cü il dekabrın 15-də Dövlət Agentliyi və Sabirabad
"ASAN xidmət” mərkəzi OHSAS 18001:2007 standartı üzrə beynəlxalq
dərəcəli sertifikata layiq görülüb. Standartın əsas tələbi xidmət
mərkəzlərinin fəaliyyət göstərdiyi inzibati binalarda təhlükəsiz və
sağlam iş mühitinin yaradılması, əməkdaşların effektiv, şəffaf və
operativ xidmət göstərməsi, eyni zamanda, vətəndaşların tam təhlükəsiz,
keyfiyyətli xidmət almağının təmin edilməsi üçün zəruri tədbirlərin
nəzərə alınmasıdır. Zəruri tələblər beynəlxalq ekspertlər tərəfindən
qiymətləndirilərək, Dövlət Agentliyinin və Sabirabad "ASAN xidmət” mərkəzinin fəaliyyət göstərdiyi inzibati binanın beynəlxalq standartlara uyğun tikildiyinə dair qərar verilib.
Azərbaycan Respublikasının Prezidenti
yanında Vətəndaşlara Xidmət və Sosial İnnovasiyalar üzrə Dövlət
Agentliyi İSO 9001:2008 idarəetmə standartı üzrə beynəlxalq sertifikata
layiq görülüb. Keyfiyyətli İdarəetmə Sisteminin Dövlət Agentliyinin
işində tətbiqi "ASAN xidmət” mərkəzlərində baş verən hər bir prosesin
şəffaf mexanizmlərə və qaydalara əsaslanmaqla həyata keçirilməsinin
göstəricisidir. Hər bir prosesin başlanğıcı və sonu arasındakı fəaliyyət
tam aydındır və tətbiq olunan şəffaf mexanizmə uyğundur.
"ASAN
xidmət” ictimai xidmət sahəsində çox ciddi dönüş yaradıb, həmçinin yeni
ideyalar, innovasiyalar tətbiq etməklə vətəndaşlarımıza ən keyfiyyətli
xidmətlər təklif edir. Azərbaycanı tanıdan və təbliğ edən milli
brendimiz olan "ASAN” bu gün Azərbaycanda yeni, müasir, mədəni,
xalqımızın mentalitetinə xas olan dəyərləri tətbiq edir, onları təbliğ
edir. Bir sözlə, "ASAN” ölkəmizin ictimai həyatda böyük rol oynayır.