Cəbrayıl rayonunun
işğaldan azad edilmiş Cocuq Mərcanlı kəndinin sakinlərinin doğma
yurdlarına növbəti köçü başlayıb. Cocuq Mərcanlı sakinləri Prezident
İlham Əliyevin 2017-ci il 15 iyun tarixli Sərəncamına əsasən, növbəti
mərhələdə Qaçqınların və Məcburi Köçkünlərin İşləri üzrə Dövlət Komitəsi
tərəfindən inşa edilən 100 evə köçürülür.
Cəbrayıl
Rayon İcra Hakimiyyəti başçısının müavini Tapdıq Nəsirov bildirib ki,
bu mərhələdə 100 fərdi yaşayış evinin, 50 yerlik uşaq bağçasının,
inzibati bina, tibb məntəqəsi və klub-icma mərkəzi üçün binaların, poçt
binasının və digər zəruri infrastruktur obyektlərinin tikintisi
aparılıb. 17 hektar ərazidə inşa edilən evlərin 14-ü birotaqlı, 38-i
ikiotaqlı, 36-sı üçotaqlı, 12-si dördotaqlıdır. Hər bir ailə üçün 0,10
hektar torpaq sahəsi ayrılıb. Qəsəbədaxili yollara asfalt örtük salınıb,
elektrik, su və qaz xətləri çəkilib. Bütün infrastruktura malik
qəsəbədə sakinlərin yaşayışı üçün hər cür şərait yaradılıb.
T.Nəsirov qeyd edib ki, Cocuq Mərcanlıya qayıdan sakinlərin məşğulluğunun təmin edilməsi üçün dövlət tərəfindən lazımi tədbirlər görülür. Azərbaycan Prezidentinin müvafiq sərəncamları əsasında Cocuq Mərcanlı
kəndində əkinlərin suvarma suyu ilə təmin olunması üçün nasos
stansiyası, suvarma kanalı inşa edilib. Birinci mərhələdə kənddə
məskunlaşan ailələr 40 hektar sahədə qarğıdalı, 10 hektarda şəkər
çuğunduru, həmçinin bostan-tərəvəz bitkiləri əkiblər.
Əhalinin
məşğulluğunun təmin edilməsi üçün Azərbaycan hökuməti ilə Türkiyə və
Azərbaycan İş Adamları və Sənayeçilər İctimai Birliyinin birgə layihəsi
çərçivəsində Cocuq Mərcanlıda
heyvandarlıq kompleksi, tərəvəz yetişdirmək üçün 15 ədəd istixana,
həmçinin suvenir hazırlayan müəssisənin yaradılması da nəzərdə tutulur.
İyirmi beş ildir Bakıda
məskunlaşan Almaz Hüseynova doğma yurda qayıtmağının sevincini bölüşüb:
"1993-cü ildən Biləcəri qəsəbəsində, şəraitsiz bir binada yaşayırdıq.
İndi isə uzun həsrətdən sonra doğma kəndimizə qayıdırıq. Artıq öz
kəndimizdə hər cür şəraiti olan ikiotaqlı evimiz var. Çox sevinirik. Bu
sevinci bizə bəxş edən, bizi doğma kəndimizə qovuşduran Prezidentimizə minnətdarlığımı bildirir, digər məcburi köçkünlərin də tezliklə öz ata-baba yurdlarına qayıtmasını arzulayıram”.
Qeyd edək ki, Prezident İlham Əliyevin Sərəncamına əsasən Cocuq Mərcanlıda
birinci mərhələdə 50 fərdi yaşayış evi, 100 şagird yerlik ümumtəhsil
məktəbi, məscid, elektrik yarımstansiyası inşa edilib, qaz, elektrik,
içməli su xətləri, ümumi uzunluğu 9 kilometr olan avtomobil yolu
çəkilib. Qəsəbədəki evlərə Cocuq Mərcanlı kəndindən olan və əsasən Bakı şəhərində müvəqqəti məskunlaşmış məcburi köçkünlər köçürülüb.
Cocuq Mərcanlı kəndi 1993-cü ildə düşmən tərəfindən işğal edilsə də, bir il sonra, yanvarın 6-da ulu öndər Heydər Əliyevin rəhbərliyi ilə uğurlu Horadiz
əməliyyatı zamanı azad olunub. Lakin Lələtəpə yüksəkliyi ermənilərin
nəzarətində olduğundan burada yaşamaq qeyri-mümkün idi. 2016-cı ilin
aprel döyüşlərində Lələtəpə yüksəkliyinin azad olunması mövcud təhlükəni
də aradan qaldırdı.(AzərTac)