"Bu gün hərbi
cərrahiyyə sahəsində dünyanın aparıcı elmi-praktiki platformalarından
biri olan Ambruaz Pare adına Beynəlxalq Hərbi Cərrahlar Forumunun 30-cu
yubiley görüşü və 1-ci Konqresi Bakı şəhərində öz işinə başlayır. İlk
növbədə Azərbaycan Respublikasının Prezidenti cənab İlham Əliyevin
salamlarını Konqresin iştirakçılarına çatdırmaq istərdim”.
XəzərXəbər xəbər verir ki, bunu Azərbaycan Prezidentinin Hüquq mühafizə orqanları ilə iş və hərbi məsələlər üzrə köməkçisi-şöbə müdiri Fuad Ələsgərov Ambruaz Pare adına Beynəlxalq Hərbi Cərrahlar Forumunun 1-ci konqresində çıxışı zamanı deyib.
Onun
sözlərinə görə, bu il Azərbaycan üçün çox əlamətdar hadisələrlə
zəngindir: "Bir neçə gün bundan öncə Azərbaycan xalqının ümummilli
lideri, Azərbaycan dövlətinin xilaskarı Heydər Əliyevin anadan olmasının 95-ci yubileyi təntənəli şəkildə qeyd edildi. May ayının 28-də isə şərqdə ilk demokratik respublika olmuş Azərbaycan Xalq Cümhuriyyətinin yaradılmasının 100 illik yubileyidir. Bu baxımdan Beynəlxalq Hərbi Cərrahlar Forumunun 1-ci Konqresinin məhz bu dövrə təsadüf etməsi çox xoş bir haldır. Konqresin Bakı şəhərində keçirilməsi münasibəti ilə Forumun prezidenti Kənan Yusifzadəni də təbrik etmək istərdim”.
F.
Ələsgərov bildirib ki, Azərbaycan iqtisadiyyatı sürətlə inkişaf edir və
ölkəmizin təşəbbüsü və iştirakı ilə dünya miqyaslı enerji və nəqliyyat
layihələri həyata keçirilir: "Bu il iyun ayının 19-da növbəti nəhəng
layihə olan Trans-Anadolu qaz kəmərinin açılış mərasimi keçiriləcəkdir.
Bu layihə Avropanın qaz ilə təmin edilməsində çox önəmli rol oynayacaqdır.
Azərbaycan
iqtisadiyyatının inkişafı əlbəttə ki, digər sahələrin, o cümlədən
sosial sahənin inkişafına da təkan verir. Azərbaycan dövləti sosial
yönümlü siyasət həyata keçirir və sosial sahənin əsas istiqamətlərindən
olan səhiyyənin inkişafı dövlətimiz üçün prioritet məsələlərdəndir.
Möhtərəm Prezidentimiz cənab İlham Əliyevin
rəhbərliyi ilə ölkəmizdə səhiyyə sistemində aparılmış islahatlar,
dövlət proqramlarının icrası nəticəsində ən müasir standartlara cavab
verən tibb müəssisələri yaradılmış, xəstəxanaların maddi-texniki bazası
gücləndirilmiş, savadlı və peşəkar kadr hazırlığına diqqət artırılıb.
Son
illərdə Azərbaycanda 600-dən çox tibb müəssisəsi tikilib və əsaslı
təmir edilib. Yalnız paytaxtda deyil, bölgələrdə də əhaliyə yüksək
səviyyəli tibbi xidmətin göstərilməsi üçün şərait yaradılır, yeni
xəstəxanalar inşa edilərək istifadəyə verilir. Bu il bölgələrdə altı
mərkəzi rayon xəstəxanasının açılması nəzərdə tutulur. Möhtərəm Prezidentimiz
bəyan etmişdir ki, 2019-cu ilə qədər Azərbaycanda müasir tibb ocağının
olmadığı heç bir şəhər qalmayacaq. Bir neçə ildir ki, Azərbaycan Prezidentinin
təşəbbüsü ilə ölkə vətəndaşlarının dövlət tərəfindən pulsuz tibbi
müayinəsi həyata keçirilir. Hər il beş milyondan artıq vətəndaşımız bu
xidmətdən istifadə edir”.
Fuad Ələsgərov,
həmçinin vurğulayıb ki, Azərbaycanda hərbi tibb sahəsinin inkişafı da
dövlətin diqqətindədir: "Bu da təbiidir. Bildiyiniz kimi Azərbaycan
ərazilərinin 20 faizi Ermənistan silahlı qüvvələrinin işğalı altındadır
və bu işğal nəticəsində təxminən 1 milyon həmyerlimiz öz doğma
yurdlarından didərgin düşmüşdür. 1994-cü ildə atəşkəs
barədə razılıq əldə olunsa da, Ermənistanın danışıqlarda
qeyri-konstruktiv mövqe göstərməsi və torpaqlarımızı hələ də işğal
altında saxlaması səbəbindən sülhə nail olmaq mümkün olmamışdır.
Ermənistan cəbhə xəttində təxribatlar törətməkdə davam edir. 2016-cı
ilin aprel ayında dinc əhaliyə qarşı törədilmiş növbəti təxribat zamanı
münaqişə qaynar fazaya keçmiş, çox sayda insan həlak olmuşdur.
Azərbaycan ordusu düşmənin layiqli cavabını vermiş, 2 min hektar
ərazimizi işğaldan azad etmişdir. Münaqişənin həllinin uzanması
Ermənistana heç nə verməyəcək. Tam əksinə. Bu ölkənin insan resursları
surətlə tükənməkdədir, iqtisadiyyat çox bərbad vəziyyətdədir. Yalnız
Azərbaycan ilə ədalətli sülhə nail olunması Ermənistanın gələcəyə ümidlə
baxması üçün şərait yarada bilər. Bu, eyni zamanda ümumən Cənubi Qafqaz regionunun inkişafı baxımından çox əhəmiyyətlidir.
Əlbəttə,
münaqişənin hər an yenidən qızışıması mümkün olan bu vəziyyətdə
Azərbaycanın hərbi tibb sahəsinə, bu sahədə müasir insfrastrukturun
yaradılmasına, yüksək peşəkarlığa malik kadrların hazırlanmasına böyük
diqqət ayırması təbiidir. Hazırda Azərbaycan Respublikasının Müdafiə
Nazirliyi, Daxili İşlər Nazirliyi, Dövlət Təhlükəsizliyi Xidməti, Dövlət Sərhəd Xidmətinin
müasir tibbi avadanlıqlarla təchiz olunmuş hospitalları mövcuddur. Bu
hospitallarda hərbi qulluqçulara, əsgər və zabitlərə yüksək səviyyədə
tibbi xidmət göstərilir.
Azərbaycan Respublikasının Prezidenti əminliyini bildirir ki, Ambruaz Pare adına Beynəlxalq Hərbi Cərrahlar Forumunun 1-ci Konqresi
çərçivəsində aparılacaq diskussiyalar, fikir mübadiləsi hərbi
cərrahiyyə sahəsində qabaqcıl təcrübə mübadiləsinə, tətbiq edilən
innovasiyalarla tanışlığa, beynəlxalq tibbi təşkilatlar, nüfuzlu səhiyyə
ocaqları arasında əməkdaşlığın dərinləşməsinə xidmət edəcəkdir. Bir
daha Konqresin işinə uğurlar arzulayıram. Ümid edirəm ki, siz həmçinin bu gözəl yaz günlərində müasirliyi və qədimliyi özündə birləşdirən Bakı şəhərində vaxtınızı səmərəli keçirəcək, paytaxtımızla yaxından tanış ola biləcəksiniz”.