Aprelin 10-da Rusiya Federasiyası Federal Məclisinin nümayəndə heyəti Azərbaycanın Mərkəzi Seçki Komissiyasında olub.
Mərkəzi Seçki Komissiyasının (MSK) sədri Məzahir Pənahov qonaqlara
prezident seçkilərinə hazırlıq işləri barədə məlumat verib. Sədr qeyd
edib ki, aprelin 11-də 5 milyon 315 minə yaxın seçici 5641 seçki
məntəqəsində səs verəcək. Səsvermənin gedişini 894 beynəlxalq, 59 minə
yaxın yerli müşahidəçi izləyəcək. Bundan başqa, 51 beynəlxalq kütləvi
informasiya vasitəsinin 118 təmsilçisi seçkiləri işıqlandıracaq. MSK
sədri bütün KİV nümayəndələrinə və müşahidəçilərə seçkiləri izləmək üçün hər cür şəraitin yaradıldığını bildirib.
Nümayəndə
heyətinin rəhbəri Lidiya Qumerova bildirib ki, Azərbaycan xalqı
seçkilərə hər zaman məsuliyyətlə yanaşır. O, 11 aprel prezident
seçkilərinə yüksək səviyyəli hazırlığın görüldüyünü söyləyib. Qeyd edib
ki, prezident seçkilərinin şəffaf və ədalətli keçəcəyinə inanır. Qonaq
diqqətə çatdırıb ki, nümayəndə heyətinin tərkibində olan təcrübəli
müşahidəçilər seçki prosesini sona qədər izləyəcəklər.