Bu gün Milli Məclisin İqtisadi Siyasət, sənaye və sahibkarlıq komitəsinin iclası keçirilib.
XəzərXəbər-in
məlumatına görə, iclasda komitə sədri Ziyad Səmədzadə bildirib ki,
"Sahibkarlıq sahəsində aparılan yoxlamaların dayandırılması haqqında"
qanuna yeni maddə əlavə edilib:
"Elə sahələr var ki, iqtisadi,
dövlət, qida təhlükəsizliyi ilə bağlıdır. Ona görə də qanunun tətbiq
dairəsi adlanan ikinci maddədə müvafiq icra hakimiyyəti orqanı
tərəfindən dərman vasitələrinin keyfiyyəti, təhlükəsizlik qaydalarına
riayət edilməsi, qida məhsullarının təhlükəsizliyinə nəzarətin həyata
keçirilməsi ilə bağlı yoxlamalar ayrıca maddə kimi əlavə olunub. Bu, çox
vacib məsələdir”.
Millət vəkili Vahid Əhmədov deyib ki, bu
vaxtadək dərman vasitələrinin keyfiyyəti, təhlükəsizliyi, o cümlədən
qida məhsullarının təhlükəsizliyinə nəzarət məqsədi ilə yoxlamalar
həyata keçirilmirdi: "Burada yalnız qida məhsullarının keyfiyyətindən
söhbət gedir. Başqa yoxlamalardan yox”.