"Azərbaycanda işsizliyin və yoxsulluğun səviyyəsi daha da aşağı düşəcək”.
XəzərXəbər xəbər verir ki, bunu Azərbaycan Respublikasının Prezidenti İlham Əliyev barama, tütün və fındıq istehsalının inkişafı məsələlərinə dair Qaxda
keçirilən respublika müşavirəsində deyib. Dövlətimizin başçısı bildirdi
ki, tütünçülüyün, baramaçılığın və fındıqçılığın inkişafına böyük
dəstək və diqqət var. Qarşıda duran vəzifələrdən danışarkən Prezident
İlham Əliyev vurğuladı ki, dövlət strateji kənd təsərrüfatı sahələrinin
inkişafı üçün öz dəstəyini davam etdirəcək. Qeyd olunan sahələrlə bağlı
sovet və müstəqillik dövrlərində əldə olunan nəticələrin statistikasına
nəzər salan Prezident İlham Əliyev artıq 13 rayonda tütün əkininin
aparıldığını bildirdi və qeyd etdi ki, tütün istehsalçılarına güzəştli
kreditlər verilməli, hər rayonda tütün qəbulu məntəqələri və qurutma
kameraları yaradılmalı, tütünün ixracı ilə bağlı bazarlar müəyyən
olunmalı, ölkədə müasir siqaret istehsal edən fabriklər fəaliyyətə
başlamalı, 2021-ci ilə qədər tütün əkini genişləndirilməlidir.
Baramaçılığın inkişafından da danışan dövlətimizin başçısı hazırda 30
rayonda barama istehsal olunduğunu bildirdi. Gələn il 500 ton barama
tədarükünün gözlənildiyini deyən Prezident İlham Əliyev 2025-ci ilə
qədər bu həcmin 6 min tona çatdırılmasının mümkünlüyünü vurğuladı, bu
sahədə dövlət dəstəyinin davam edəcəyini, növbəti mərhələdə 8 milyon tut
tinginin əkiləcəyini və bu rəqəmin ümumilikdə 10 milyona
çatdırılmasının planlaşdırıldığını qeyd etdi. Bununla yanaşı, damazlıq
barama təsərrüfatlarının fəaliyyətinin yaxşılaşdırılması, qəbul
məntəqələrinin və yeni ipək kombinatının yaradılması, "Şəki İpək” ASC-nin fəaliyyətinin daha da gücləndirilməsi ilə bağlı tapşırıqlarını verdi.
Fındıqçılıqda da müəyyən inkişafın getdiyini, lakin hələ istənilən
səviyyəyə çatmaq üçün çox işlərin görülməsinin vacibliyini bildirən
Prezident İlham Əliyev 80 min hektar sahədə fındıq bağlarının
salınmasının qarşıdakı dövrdə əsas hədəf olduğunu bildirdi.
Fındıqçılığın çox gəlirli və valyuta gətirən bir sahə olduğunu deyən
dövlətimizin başçısı fındıq istehsalı ilə bağlı bütün proseslərin
ölkəmizdə aparılmasının vacibliyini vurğuladı.
Həyata keçirilən bu tədbirlərin ilk növbədə əhalinin rifah halının
yaxşılaşmasına və qeyri-neft sektorunun inkişafına xidmət etdiyini deyən
dövlətimizin başçısı kənd təsərrüfatının inkişafı ilə bağlı görülən
işlərin əhəmiyyətindən danışdı, bu müşavirənin də nəticələrinin müsbət
olacağına əminliyini ifadə etdi.