İsmayıllıda nə baş verir? Hamını heyrətə gətirən MÜƏMMALI HADİSƏ

İsmayıllı rayonun Girk kəndində heyvanların süd vəzilərinin naməlum şəraitdə kəsilməsi ilə bağlı araşdırma aparılır. Təsərrüfat sahiblər ilk dəfədir belə halla qarşılaşdıqlarını bildirir. Onlar heyvanların süd vəzilərinin qərəzli şəkildə insanlar tərəfindən kəsildiyini düşünür.

Kənd Təsərrüfatı Nazirliyi yanında Dövlət Baytarlıq Nəzarəti Xidmətinin rəhbəri Yolçu Xanvəli Publika.az-a açıqlamasında bildirib ki, artıq əməkdaşlarının kənddə olub, heyvanlar üzərində müalicə tədbirləri həyata keçiriblər.

Onun sözlərinə görə, aparılan müayinə və müşahidələr nəticəsində heyvanlarda xəstəlik əlamətləri aşkar edilməyib:

"Heyvanların süd vəzlərində müşahidə olunan hal sırf kəsilmə əməliyyatıdır. Həmin heyvanlarda heç bir xəstəlik müşahidə edilmir. Çünki bu hal xəstəlikdən baş versəydi, süd vəzilərində xəstəliyin gözlə görünən əlamətləri müşahidə edilə bilərdi. Bu vaxta qədər hər hansı xəstəlikdən heyvanların məməsinin birdən-birə düşməsi halı qeydə alınmayıb. Bununla yanaşı nümunələr götürülb, yaxın günlərdə nəticələr açıqlanacaq. Son bir həftədir bu barədə təsərrüfat sahiblərindən müraciət edilib, bu vaxta qədər təxminən 17 baş heyvanda bu hal müşahidə olunub. Kəsilmənin insan, yoxsa vəhşi təbiət tərəfindən olması yalnız araşdırmalardan sonra təsdiqini tapacaq. Əvvəlki illərdə yırtıcılar tərəfində süd verən heyvanların əmilməsi, buna görə də südlərin azalması halları müşahidə edilib”.

Y.Xanvəli bildirib ki, süd vəzlərinin kəsimi heyvanların yalnız südvermə qabiliyyətinə təsir göstərir.

"Həmin heyvanlar ətlik kimi istifadə edilə bilər”.

Girk kənd icra nümayəndəsi Paşa Mirzəzadə Publika.az-a açıqlamasında bu gün ərzində vəziyyətin stabil olduğunu, təkrar eyni halların müşahidə edilmədiyini deyib:

"Bununla yanaşı heyvanların süd vəzilərinin hansı şəraitdə qoparılması ilə bağlı aidiyyəti qurumlar araşdırma aparır. Bizdə olan məlumata görə, təxminən 6-7 təsərrüfat sahibi bu problemlə bağlı müraciət edib, onların hər birində 1-2 heyvanda bu əlamətlər müşahidə olunur”.

İcra nümayəndəsi bu vaxta qədər heyvanların süd vəzilərinin yırtıcılar tərəfindən qoparılması halını müşahidə etmədiklərini dedi:

"Heyvanların süd vəzilərinin qərəzli şəkildə kəsilməsi inandırıcı deyil. Çünki belə olan halda heyvan sakit dayanmaz, reaksiya verərdi, səs çıxarardı. Təsərrüfat sahibləri heyvanları otlaq sahələrinə nəzarətsiz buraxırlar. Dağlıq ərazidir, ola bilər ki, həmin vaxtda gəmiricilər tərəfindən süd vəziləri qoparılsın. Bu hallardan qorunmaq üçün heyvanlarını həyətyanı sahələrində saxlamalıdırlar. Hər halda dəqiq səbəb analizlərin nəticəsindən sonra bəlli olacaq".