ABŞ İranın metallurgiya sənayesinə qarşı yeni sanksiyalar tətbiq edib. Bu dəfə İran ilə yanaşı, digər ölkələrin metallurgiya sahəsində fəaliyyət göstərən ölkə şirkətlərinin adı da sanksiyalar siyahısına əlavə edilib.
Xezerxeber.az ABŞ-ın Maliyyə Nazirliyinin rəsmi saytına istinadla xəbər verir ki, İranın 3 şirkəti ilə yanaşı, Birləşmiş Ərəb Əmirliklərinin, Çinin və Almaniyanın da şirkətləri sanksiya altına düşüb. Ümmumilikdə adı çəkilən dövlətlərə məxsus 8 metallurgiya şirkətinə qarşı sanksiya tətbiq edilib. Digər ölkələrə məxsus şirkətlər İran ilə əməkdaşlıqda və ABŞ-ın sanksiya rejimini pozmaqda ittiham edilir. Bu şirkətlərin rəhbərləri ABŞ-a gələ bilməz və ABŞ bankları ilə maliyyə əməliyyatları aparmaq imkanından məhrum edilirlər.
ABŞ-ın dövlət katibi Maykl Pompeo yeni sanksiyaları şərh edərək bildirib ki, rəsmi Vaşinqton İrana qarşı təzyiqləri davam etdirəcək.
İran və adı yuxarıda göstərilən dövlətlər hələlik ABŞ-ın bu addımına münasibət bildirməyiblər.