Keçən il 5 mindən çox gürcüyə Yunanıstanda yaşamaq icazəsi verilib

Keçən il Gürcüstandan mühacirət etmiş vətəndaşlara ən çox yaşayış icazəsini Yunanıstan hökuməti verib.

AZƏRTAC xəbər verir ki, 2018-ci ildə Yunanıstan Miqrasiya Siyasəti Departamenti tərəfindən 5006 nəfər Gürcüstan vətəndaşına ölkədə yaşamaq üçün şəxsiyyəti təsdiq edən və yaşamaq hüququ verən vəsiqə təqdim olunub. Gürcüstanın Yunanıstandakı səfiri İosif Nanobaşvili mətbuata açıqlamasında deyib ki, bunların 2286-sı ilkin yaşayış icazəsidir.

Diplomat bildirib ki, Yunanıstana səfər edən və burada daimi yaşamaq istəyən Gürcüstan vətəndaşlarına dəstək məsələsi səfirliyin fəaliyyətinin prioritetlərindən biridir. Səfirlik bu məsələyə görə Yunanıstanın müvafiq strukturları ilə əməkdaşlıq edir.