İndoneziyada qızıl mədənində həlak olanların sayı 27-yə çatıb

İndoneziyanın mərkəzi hissəsində qızıl mədəninin çökməsi nəticəsində həlak olanların sayı 27-yə çatıb.

AZƏRTAC xəbər verir ki, bu barədə Antara agentliyi məlumat yayıb.

"Biz ağır texnikadan istifadə edərək sağ qalanların təxliyəsini davam etdiririk”, - deyə İndoneziya Xilasetmə Xidmətinin nümayəndəsi bildirib.

Ötən gün 13 nəfərin həlak olduğu barədə məlumat verilmişdi. Yerli hakimiyyət orqanlarının yaydığı məlumata görə, mədəndə hələ də 100-ə yaxın şaxtaçı qalıb.

Şimali Sulavesi əyalətindəki mədən fevralın 26-da çöküb. İndiyədək xilas edilən 19 şaxtaçı xəstəxanaya yerləşdirilib.