ABŞ təklikdə qaldı - Avropa İranla nüvə razılaşmasını pozmayacaq

Xarici işlər nazirləri səviyyəsində İranla nüvə danışıqlarının həyata keçirilməsi üzrə Birgə Komissiyanın iclasında iştirak edən üzvlər birgə qərar qəbul ediblər.

Modern.az xəbər verir ki, görüşün nəticəsi olaraq üzvlər (Fransa, Britaniya, Almaniya, Rusiya, Çin və İran) öz şirkətlərini ABŞ sanksiyalarından müdafiə etməyə razılaşıblar.

"Görüş iştirakçıları şirkətləri ABŞ sanksiyalarının xarici təsirlərindən qorunmaq niyyətlərini bəyan etdilər” - bu barədə iyulun 6-da Avstriya paytaxtında keçirilmiş görüşün nəticələri barədə bəyanatda bildirilib.

Tərəflər İran neft və neft məhsullarının, həmçinin qazının ixracatını davam etdirməyi qərara alıblar.

Ərakdakı reaktorun modernləşdirilməsi üzrə işçi qrupuna sədrliyi bundan sonra Britaniya davam etdirəcək.

Həmçinin, tərəflər Birgə Fəaliyyət Planı (BFP) çərçivəsində reaktorun təmirinə dəstəyi davam etdirəcəklər.

Bundan əlavə, birgə bəyanatda BFP çərçivəsində təhlükəsiz atom sahəsində böyük layihələrə dəstək barədə də razılıq əldə olunub.

Qeyd edək ki, 2015-ci ildə İran və altılıq (ABŞ, Rusiya, Fransa, Britaniya, Çin və Almaniya) ölkələri arasında razılıq əldə edilmişdi. Razılığa əsasən, İran atom silahı proqramından əl çəkir, tərəflər isə ona qarşı sanksiyaları mərhələli şəkildə aradan qaldırırlar. 2018-ci ildə ABŞ prezidenti Donald Tramp bu sənədin İrana nüvə silahı əldə etməsinə mane olmayacağını iddia edərək, müqavilədən çəkildiyini bildirib. Digər tərəflər isə İranın şərtlərə əməl etdiyini və bundan sonra sanksiyalarda İrana dəstək olacaqlarını bəyan ediblər.