ABŞ prezidenti Donald
Tramp bu gün Kanadanın Kvebek şəhərində keçiriləcək G7 ölkələri
liderlərinin sammiti çərçivəsində Böyük Britaniyanın baş naziri Tereza
Mey ilə təkbətək görüşünü ləğv edib. Bu barədə "The Telegraph" qəzeti Tramp administrasiyasındakı mənbəyə istinadən məlumat yayıb.
Amerika
rəsmisi qeyd edib ki, Tramp Meyin məktəb müəlliməsi kimi danışıq
tonundan bezib: "İnciklik olmasın, amma Mey elə bil məktəb
müəlliməsidir. Düşünmürəm ki, onun kiminləsə yaxşı münasibətləri var”.
Mənbə, həmçinin bildirib ki, ABŞ prezidenti Britaniya baş nazirinin xüsusi xahişlərindən narazıdır. Trampın fikrincə, Mey ABŞ-Britaniya münasibətlərindən öz şəxsi mənfəəti üçün istifadə etməyə çalışır.
Qeyd edək ki, bu gün və sabah Kvebek şəhərində G7 ölkələri (ABŞ, Kanada, Fransa, Almaniya, Böyük Britaniya,
İtaliya və Yaponiya) dövlət başçılarının sammiti keçiriləcək. Sammit
çərçivəsində Tramp yalnız Kanadanın baş naziri Castin Trüdo və Fransa
prezidenti Emmanuel Makronla ikitərəfli danışıqlar aparacaq.