Xəzər Xəbər

Daha bir ölkə Qüdsdə səfirlik açdı

Dünya | 14:29 • 21 May 2018
Daha bir ölkə Qüdsdə səfirlik açdı
ABŞ və Qvatemaladan sonra Paraqvay da İsraildəki səfirliyini paytaxt Təl-Əvivdən Qüdsə köçürüb.


Bu gün baş tutan açılış mərasimində Paraqvay prezidenti Orasio Kartes və İsrailin baş naziri Benyamin Netanyahu iştirak ediblər.


Xatırladaq ki, BMT-nin 1947-ci ildə qəbul olunan qətnaməsinə əsasən, Qüds şəhəri beynləxalq statusa malikdir və nə İsrail, nə də Fələstinin birtərəfli paytaxtı deyil. Bu səbəbdəndir ki, heç bir dövlət indiyədək orada səfirlik açmayıb. 1967-ci ildəki 6 günlük müharibədə İsrail Qüdsün fələstinlilərə məxsus şərq hissəsini də işğal edərək, 1980-cı ildə şəhəri birtərəfli qaydada özünün paytaxtı elan edib. BMT Təhlükəsizlik Şurasının İsrailin bu addımını pisləyən qətnaməsi qəbul olunub. Lakin ABŞ həmin sənədin səsverməsinə qatılmayıb.

İsrailin Şərqi Qüdsü işğal etməsinə baxmyaraq, indiyədək orada yaşayan fələstinlilərə İsrail vətəndaşlığı verilməyib.



Qeyd edək ki, ABŞ prezidenti Donald Tramp 2017-ci ilin dekabrın 6-da Qüdsü İsrailin paytaxtı kimi tanıdığına dair qərar qəbul edib. Bu il mayın 14-də isə Amerika İsraildəki səfirliyini rəsmi olaraq Qüdsə köçürüb. Buna etiraz edən 10 mindən çox fələstinlinin Qəzza zonasındakı aksiyasını dağıtmaq üçün İsrail ordusu silahlı güc tətbiq edib. Nəticədə 62 fələstinli ölüb, 3 mindən çoxu yaralanıb.

Xəbər lenti