Yaponiya və ABŞ liderləri KXDR-ə qarşı təzyiqi artırmaq barədə razılığa gəliblər

Yaponiyanın Baş naziri Şinzo Abe və ABŞ Prezidenti Donald Tramp Koreya Xalq Demokratik Respublikasına (KXDR) qarşı təzyiqi artırmaq barədə razılığa gəliblər.

Bu barədə AZƏRTAC-ın Yaponiyadakı bürosuna Xarici İşlər Nazirliyindən daxil olan məlumatda bildirilir ki, həmin razılaşma liderlər arasında telefon danışığı zamanı əldə edilib.

Məlumatda vurğulanır ki, iki ölkənin liderləri KXDR nüvə-raket proqramlarından imtina edənədək bu ölkəyə maksimum təzyiq göstərilməsi barədə qəti mövqelərini bir daha təsdiqləyiblər.

Baş nazir Şinzo Abenin sözlərini sitat gətirən Kyodo agentliyi yazıb: ”Şimali Koreyanın nüvə proramından imtina etməsi üçün birgə fəaliyyətimizin gələcək istiqamətlərini müzakirə etdik”. Telefon danışığı zamanı, eyni zamanda, yeni iş yerlərinin yaradılmaı ilə əlaqədar Yaponiya şirkətləri tərəfindən ABŞ-a investisiyaların yönəldilməsi istiqamətində də müzakirələr aparıldığı bildirilir.