Yaponiya özünümüdafiə hava qüvvələrinin helikopteri Saqa prefekturasındakı ibtidai məktəbin yaxınlığında qəzaya uğrayıb.
AZƏRTAC xəbər verir ki, NHK telekanalının yerli hakimiyyət orqanlarına istinadla yaydığı məlumata görə, insident yerli vaxtla saat 16:00 radələrində (Bakı vaxtı ilə 11:00) Kandzaki şəhərində baş verib. Helikopter yerə düşdükdən sonra yanıb. Həmçinin məktəbin yaxınlığındakı binalardan birində də yanğın baş verdiyi bildirilir. Qəza yerinə yanğınsöndürmə xidmətinin əməkdaşları və həkimlər göndərilib.
Hələlik başqa məlumatlar, o cümlədən zərər çəkənlər barədə informasiya verilmir. Qəzanın səbəbləri araşdırılır.