Qasırğa 8 nəfərin həyatına son qoyub, 86 balıqçı itkin düşüb

Hindistanın cənub ştatlarında qasırğa ilə müşayiət olunan "Okhi” siklonu nəticəsində azı 8 nəfər həlak olub, 86 nəfər isə itkin düşüb.

NDTV telekanalının yaydığı məlumata görə, qasırğa ölkənin Kerala və Tamiland ştatlarına noyabrın 30-da çatıb. Tamiland ştatının Kanyakumari şəhərinin alçaqlıqda yerləşən rayonlarından 845 nəfər təxliyə olunub. Qasırğa zamanı dənizdə olan 86 balıqçının axtarışları davam edir.

Hindistanın meteoroloji xidməti küləyin sürətinin saatda 65-75 kilometrə çatdığını bildirib. Cənub ştatlarının 4 şəhərində məktəblər bağlanıb, insanlara evlərini tərk etməmək tövsiyə olunub. Siklon səbəbindən bəzi rayonlar elektriksiz qalıb.

Ölkənin cənub ştatlarında, həmçinin Andaman, Nikobar və Lakşadvip adalarında qasırğanın sutka ərzində davam edəcəyi gözlənilir.